Izraeli mund ta marrë nën kontroll ushtarak Gazën, por kjo do t’i kushtojë në afat të gjatë.
Ofer Guterman, hulumtues i lartë në Institutin Izraelit për Studime të Sigurisë Kombëtare, tha se ndërsa Izraeli ka kapacitetin ushtarak për të marrë nën kontroll Gazën, plani mund të bëhet i komplikuar nëse përfshin një okupim të gjatë.
Udhëheqja izraelite do të duhet të marrë parasysh një numër faktorësh, duke përfshirë mosmarrëveshjet politike, vështirësitë ekonomike dhe pakënaqësinë publike, tha Guterman, i cili më parë ka shërbyer si analist për degën e inteligjencës së ushtrisë.
Megjithatë, kryeministri izraelit, Benjamin Netanyahu është nën presion të madh nga baza e djathtë për të marrë një qëndrim më të ashpër ndaj luftës, të cilin Guterman tha se kryeministri ka tendencë ta ndjekë gjatë gjithë konfliktit, shkruan cnn.
Para miratimit nga kabineti i sigurisë izraelite të një plani për të marrë nën kontroll qytetin e Gazës, anëtarët ekstremë të qeverisë po kërkonin okupimin e Gazës dhe po propozonin masa për të inkurajuar popullsinë e saj që të largohet plotësisht nga territori.
Por nga një perspektivë ushtarake, tha Guterman, okupimi i të gjithë enklavës është i mundur.
“Ne e kemi bërë më parë. Ne kemi qenë në Gaza për dekada”, shtoi ai.
Ndryshe, Izraeli thotë se kontrollon 75 për qind të Gazës, ndërsa OKB vlerëson se rreth 87 për qind e territorit është ose në zona të militarizuara ose nën urdhra evakuimi. /Telegrafi/
