Marrëveshja për lëvizjen me letërnjoftime, Von Cramon, Dodikut: Mbaje fjalën, bllokimi i qytetarëve të Kosovës i papranueshëm

Deputetët e Kuvendit të Kosovës javën e kaluar kanë miratuar marrëveshjen për lëvizjen e lirë me letërnjoftime në Ballkanin Perëndimor, në të cilën marrëveshje përfshihet edhe lëvizja me letërnjoftime me Bosnjë dhe Hercegovinën. Megjithatë, ky proces po bllokohet nga kreu i “Republika Srpska”, Milorad Dodik.

Ndaj tij ka reaguar ashpër të mërkurën raportuesja për Kosovën në Parlamentin Evropian, Viola von Cramon, e cila i ka bërë thirrje Dodikut që ta mbajë fjalën dhe ta ratifikojë marrëveshjen.

Lexo po ashtu Kuvendi ratifikon Marrëveshjen për lëvizjen me letërnjoftime me Bosnjë dhe Hercegovinën

“Procesi i Berlinit është për t’i bërë njerëzit të lëvizin lirshëm, të punojnë dhe të tregtojnë në Ballkanin Perëndimor. Bllokimi i ratifikimit dhe pengimi i qytetarëve të Kosovës për të udhëtuar lirshëm është i papranueshëm. I bëj thirrje Milorad Dodikut që ta mbajë fjalën dhe ta ratifikojë!”, ka shkruar Von Cramon në Twitter.

Tutje, ajo ka thënë se bllokada të tilla e pengojnë rrugën drejt Bashkimit Evropian.

#BerlinProcess is there to make people move freely, work and trade in the #WesternBalkans.

Blocking of ratification & preventing #Kosovo citizens to travel freely is unacceptable.

I urge @MiloradDodik to keep his word and to ratify it! Such blockades are preventing ?? path. pic.twitter.com/QyQBho34ql

— Viola von Cramon ???? (@ViolavonCramon) March 1, 2023

Ndryshe, gjashtë vendet e Ballkanit Perëndimor më 3 nëntor 2022 në Berlin kanë nënshkruar tri marrëveshjet e mobilitetit.

Lexo po ashtu Dodik paralajmëron bllokim të marrëveshjes për kalim të kufirit vetëm me letërnjoftim ndërmjet Bosnjës dhe Kosovës

Ato parashikojnë lëvizjen e lirë të njerëzve me karta identiteti, njohjen e diplomave dhe kualifikimeve për tri profesione: mjekët, arkitektët dhe dentistët.

Nënshkrimi është bërë nga kryeministrat e vendeve të Ballkanit Perëndimor, të cilët në Samitin e Berlinit konsiderohen si të barabartë.

Kancelari gjerman, Olaf Scholz kishte lavdëruar arritjen e tri marrëveshjeve të mobilitetit, që është nënshkruar në kuadër të samitit, duke i quajtur ato “tre hapa të mëdhenj” dhe “të guximshëm” që do t’ua bëjnë komunikimin më të lehtë njerëzve në rajon.

Procesi i Berlinit është iniciuar nga kancelarja Angela Merkel, në vitin 2014. /Telegrafi/