Maqedoni, procedurë parahetimore për regjistrimin e parealizuar të popullsisë në vitin 2011

Regjistrimi i parealizuar i popullsisë në vitin 2011 është pjesë e ‘bombave’ të cilat kryeministri Zoran Zaev si lider i opozitës ia dorëzoi Prokurorisë speciale publike. Në procedurën parahetimore që po vazhdon, sot si dëshmitar në prokurori ishte ish-drejtori i burgut të Idrizovës, Zhivko Pejkovski i cili për Tv24 e vërtetoi informatën. Ai për këtë procedurë në prokuroria ka dëshmuar në kohëzgjatje prej gjysmë ore.

“Është e vërtetë, këtë mëngjes isha i ftuar si dëshmitar në PSP. Bëhet fjalë për regjistrimin e popullsisë në vitin 2011”, tha Pejkovski.

Nga PSP nuk zbulojnë detaje për procedurën e re, pasi që siç thonë, bëhet fjalë për procedurë parahetimore. Përndryshe, Pejkovski ishte në listën e të falurve nga presidenti Gjorge Ivanov në prill të vitit 2016, kur ai i fali të gjithë personat e përfshirë në procedura parahetimore, hetimore dhe akuza nga PSP. Ai menjëherë dërgoi letër deri te presidenti duke kërkuar tërheqjen e faljes.

Pritet që këto ditë në pytje të thirren edhe persona tjerë të cilët akuzohen nga PSP për këtë rast, por edhe për procedura tjera parahetimore. Ditën e mërkurë, si dëshmitar ishte ftuar edhe ish-kryeministri, Nikolla Gruevski./Telegrafi/