Makinat elektrike më nuk do të jenë tërësisht të qeta, së paku jo në Shtetet e Bashkuara (Foto)

Në saje të ligjeve të reja, makinat në Shtetet e Bashkuara duhet të lëshojnë tinguj

Lëvizja në qetësi të plotë, është një ndër problemet më të mëdha të makinave elektrike, transmeton Telegrafi. Ka pasur shumë kërkesa që këto makina të bëjnë zhurmë kur janë në shpejtësi, ndërsa për këtë ka pasur mbështetje edhe nga Mercedes-Benz. Kjo e fundit, ka kërkuar ndihmën e grupit Linkin Park, për krijimin e një tingulli që i shoqëron ato gjatë udhëtimit. Por, ende nuk është prezantuar diçka në këtë drejtim. Së fundmi, janë finalizuar rregullat, se çfarë tingulli do të kenë makinat elektrike, që lëvizin në Shtetet e Bashkuara.

Departamenti i Transportit, ka kërkuar që ME-të dhe hibridët, të kenë tinguj të veçantë, për të parandaluar kalimtarët në rrugë. Këto rregulla janë propozuar më 2010, por ishin shtyrë vazhdimisht. Prodhuesve si Tesla, Nissan dhe GM, u kërkohet që veturat e tyre të jenë të zhurmshme, kur lëvizin nën 30 kilometra në orë. Qëllimi kryesor është parandalimi i shkeljes së kalimtarëve, çiklistëve e posaçërisht kalimtarëve të verbër. Megjithëse rregullat janë finalizuar, prodhuesit mund të presin deri më 2020 për t’i vënë në funksion. Por, në së paku 50 për qind të makinave, duhet të vënë tinguj deri në shtator të vitit që vjen.

Problemi është se këto makina, është vështirë të dëgjohen, së paku kur lëvizin ngadalë. Ka frikë se edhe tingujt e shtuar, mund të mbyten nga era dhe zhvillimet tjera. Brenda dy vitesh, pritet të vendosen këta zhurmues në 530 mijë makina, gjë që do të shmangte 2,400 aksidente. Në ligje nuk është përcaktuar se si duhet të tingëllojnë, gjë që pritet të ofrohet nga prodhuesi, ndërsa të zgjidhet nga klienti. Këto intervenime do t’i kushtojnë industrisë automobilistike rreth 40 milionë dollarë, por do të kursejnë deri në 350 milionë dollarë pagesa për kompensim. Ende nuk dihet çfarë tinguj mund të dëgjojmë. Por, të gjithë besojnë se Elon Musk, mund të ketë disa opsione zbavitëse për modelet nga Tesla. /Telegrafi/