Cakolli: LVV, PDK e LDK do të kenë nga një nënkryetar të Kuvendit, dy të tjerë iu takojnë minoriteve

Ushtruesja e detyrës e presidentes së Kosovës, Vjosa Osmani ka caktuar për datën 22 mars (e hënë) seancën konstituive të Legjislaturës VIII të Kuvendit të Kosovës, të dalë nga zgjedhjet e 14 shkurtit.

Por, deri te seanca konstituive janë disa përgatitje procedurale, që sipas Rregullorës së Punës së Kuvendit, bëhen nga kryesia e Kuvendit e legjislaturës paraprake.

“Mbledhja e nesërme e Kryesisë së legjislaturës së kaluar, lidhur me përgatitjet për seancën konstitutive, shërben vetëm në aspektin teknik, për të caktuar rendin e ditës dhe vendet ku do të ulen deputetët, sipas grupeve përkatëse parlamentare”, tregon përmes një shënimi në Facebook, hulumtuesi i KDI-së Eugen Cakolli.

Ai ka treguar edhe nënkryetarët që iu takojnë subjekteve politike në bazë të fuqisë politike.

“Rendi i ditës gjatë seancës konstituive përfshin formimin e komisioneve të përkohshme për verifikimin e kuorumit dhe mandateve, si dhe zgjedhjen e kryetarit dhe pesë nënkryetarëve të Kuvendit – që vijnë nga radhët e tri grupeve më të mëdha parlamentare LVV, PDK dhe LDK – si dhe dy nga radhët e komuniteteve – 1 serb dhe një nga komunitetet tjera jo-shumicë”, ka treguar më tej Cakolli./Telegrafi/