Luajtja me kukulla mund t’i ndihmojë fëmijët të mësojnë aftësi sociale

Loja me kukulla mund të ndihmojë zhvillimin social të fëmijëve, përfshirë ata me autizëm – tregon një studim.

Fëmijët me tipare të autizmit treguan rritje të aktivitetit të trurit të lidhur me përpunimin social kur përfshiheshin në biseda gjatë lojës së kukullave, zbuluan studiuesit e Universitetit të Cardiffit.

Studimi sugjeron se angazhimi më i gjerë social me të tjerët gjatë përfshirjes në lojën e kukullave, ishte një rrugë unike drejt zhvillimit social për këta fëmijë.

Fëmijët neurotipikë kishin më shumë gjasa t’i diskutonin mendimet dhe emocionet e kukullave. Studiuesit thanë se pavarësisht këtij ndryshimi, të dy grupet mund të jenë në gjendje të përfitojnë nga loja e kukullave duke e përdorur atë si një mjet për praktikimin e skenarëve shoqërorë dhe zhvillimin e aftësive sociale.

“Studimi ynë tregon se loja me kukulla mund të inkurajojë përpunimin social te fëmijët, pavarësisht nga profili i tyre neuro-zhvillimor”.

“Gjetjet tregojnë se të gjithë fëmijët, madje edhe ata që shfaqin tipare neurodivergjente që zakonisht lidhen me autizmin, mund ta përdorin lojën e kukullave si një mjet për praktikimin e skenarëve shoqërorë dhe zhvillimin e aftësive sociale, siç është empatia”, ka thënë studiuesja kryesore, Dr Sarah Gerson, citon The Sun.

Autizmi do të thotë se njerëzit mund ta kenë më të vështirë të komunikojnë dhe të ndërveprojnë me të tjerët, ose të luftojnë për të kuptuar se si mendojnë ose ndjehen njerëzit e tjerë.

Dritat dhe zhurmat e forta mund të jenë dërrmuese, stresuese ose të pakëndshme, kurse situatat e panjohura dhe ngjarjet sociale mund t’i bëjnë njerëzit autikë të ndihen të shqetësuar ose të mërzitur.

Nuk është një gjendje apo sëmundje – do të thotë se truri i njerëzve funksionon në një mënyrë të ndryshme nga njerëzit neurotipikë dhe është diçka që e keni për gjithë jetën tuaj.

Hulumtimi i fundit vjen nga një studim shumëvjeçar nga Qendra për Shkencën e Zhvillimit Njerëzor në Shkollën e Psikologjisë të universitetit. Vitet e mëparshme janë fokusuar te fëmijët neurotipikë dhe kanë gjetur përfitime të gjera sociale dhe zhvillimore të lojës me kukulla.

Tani në vitin e tretë, ekipi hulumtues i ka përsëritur ato rezultate me një gamë më të larmishme pjesëmarrësish, duke përfshirë fëmijë të moshës nga katër deri në tetë vjeç që shfaqin nivele të larta dhe të ulëta të tipareve të lidhura me autizmin.

Gjatë vëzhgimit të fëmijëve, studiuesit panë një rritje të aktivitetit të trurit – në zonën e përfshirë në përpunimin social dhe emocional, siç është empatia – kur luanin me kukulla, si për lojën me një partner social ashtu edhe gjatë lojës së vetme me kukullave, ndërsa aktiviteti ishte më i ulët kur luanin vetëm në një tablet.

Rezultatet e studimit sugjerojnë se loja me kukulla mund të mbështesë përpunimin social, pavarësisht nga profili neurozhvillues i fëmijës, por përmes rrugëve të ndryshme.

Hulumtime të tjera kanë treguar se përpunimi social dhe aftësitë e ndjeshmërisë janë përcaktues të rëndësishëm në suksesin e ardhshëm emocional, akademik dhe social të fëmijëve. /Telegrafi/