LR-PDSH: Kryetari Ajvazi nuk mund t’i ikë çdoherë papërgjegjësisë për ujin e pijshëm në Haraçinë

Lëvizja për Reforma PDSH në një komunikatë për Telegrafi Maqedoni ka reaguar në lidhje për kushtet e Haraçinës, gjegjësisht për ujin e pijshëm dhe kushtet e jetesës të banorëve të këtij rajoni.

‘Administrata komunale e Haraçinës që udhëhiqet nga kuadër i BDI-së, gjithnjë e më tepër po i relativizojnë problemet thelbësore të shqiptarëve. Në komunën e Haraçinës paraqitet situatë mjaft e rënduar me mungesë të ujit të pijshëm, infrastrukturës rrugore, deponisë së mbeturinave dhe kanalizimit të ujërave të zeza! Në këtë kohë, kur jeta në Haraçinë është krejt e pamundur të zhvillohet normalisht, kryetari i saj Brahim Ajvazi ende nuk e sheh të arsyeshme zgjidhjen e këtyre problemeve kaq thelbësore për banorët e vendit.

Lëvizja për Reforma – PDSH u bën thirrje institucioneve komunale kompetente dhe njëkohësisht kryetarit të komunës së Haraçinës që të angazhohet direkt në zgjidhjen e këtij problemi jetik për banorët dhe ta rregullojë ujin e pijshëm, dhe të njëkohësisht të angazhohet për ta përmirësuar standardin e jetesës së banorëve, pasi ka detyrim ndaj banorëve t’u dalë në krahë për zgjidhjen e problemeve që mbartin kohëve të fundit. Kjo papërgjegjësi morale dhe profesionale e komunës së Haraçinës është një akt i ulët dhe ndërkohë banorëve të vendit u bëhet padrejtësi që në këtë kohë të mos kenë ujë të pijshëm, për të cilën uji është e drejtë natyrore e gjithkujt. Kryetari Brahim Ajvazi nuk mund t’i ikë përgjithnjë ujit të pijshëm në Haraçinë, pasi vjen koha kur populli do ta kërkojë të drejtën e vete përmes mekanizmave të ndryshme. Edhe njëherë, LR-PDSH i bën apel komunës së Haraçinës dhe pushtetit të ndërmarrin masat adekuate për zgjidhjen e problemit me ujë të pijshëm për banorët, dhe t’u jepen fund njëherë e mirë problemeve të tilla elementare’, thuhet në reagimin e Lëvizjes. /Telegrafi/