Liderët evropianë mbështesin Zelenskyn pasi Trump e quajti “diktator”

Kryeministri britanik Keir Starmer ka mbrojtur presidentin ukrainas Volodymyr Zelensky të mërkurën pasi presidenti amerikan Donald Trump e quajti udhëheqësin ukrainas  “diktator”.

Zelensky ishte një “udhëheqës i zgjedhur në mënyrë demokratike” dhe ishte “plotësisht e arsyeshme të pezulloheshin zgjedhjet gjatë kohës së luftës, siç bëri Britania e Madhe gjatë Luftës së Dytë Botërore”, tha Downing Street.

Trump dhe Zelensky shkëmbyen fjalë, ku presidenti ukrainas tha se Trump “po jeton në një hapësirë ​​dezinformimi” të qeverisur nga Moska, pasi Trump shtyu përpara bisedimet SHBA-Rusi në Arabinë Saudite nga të cilat Kievi u përjashtua.

Duke folur me gazetarët në Florida, Trump e quajti Zelensky një “diktator” dhe pretendoi se ai “refuzoi të kishte zgjedhje” në Ukrainë, transmeotn Telegrafi.

Mandati pesëvjeçar i Zelensky do të përfundonte në maj 2024. Megjithatë, zgjedhjet në Ukrainë janë pezulluar pasi vendi shpalli gjendjen ushtarake në përgjigje të pushtimit në shkallë të plotë në shkurt 2022.

Komentet e Trump tërhoqën kritika nga shumë liderë evropianë, përfshirë kancelarin gjerman Olaf Scholz, i cili postoi në X se “është thjesht e gabuar dhe e rrezikshme të mohosh legjitimitetin demokratik të presidentit Zelensky”.

“Fakti që zgjedhjet e rregullta nuk mund të zhvillohen në mes të një lufte, është në përputhje me kërkesat e kushtetutës së Ukrainës dhe ligjeve zgjedhore. Askush nuk duhet të pretendojë të kundërtën”, tha Scholz.

Kryeministri suedez Ulf Kristersson tha gjithashtu se përdorimi i fjalës diktator nga Trump ishte “i pasaktë”, ndërsa ministrja e Jashtme e Gjermanisë, Annalena Baerbock i quajti komentet “absurde”.

“Nëse shikoni botën reale në vend që thjesht të shkruani një postim në X, atëherë e dini se kush në Evropë duhet të jetojë në kushtet e një diktature: njerëzit në Rusi, njerëzit në Bjellorusi”, tha Baerbock për transmetuesin publik ZDF.

Lideri i partisë më të madhe opozitare të Gjermanisë dhe kandidati kryesor në zgjedhjet e së dielës, Friedrich Merz tha se komentet e Trump ishin “një përmbysje klasike e rolit të autorit dhe viktimës”.

“Të jem i sinqertë, jam disi i tronditur që Donald Trump tani e ka bërë të tijën”, tha Merz për transmetuesin ARD.

Presidenti francez Emmanuel Macron postoi në X se “Ukraina duhet të përfshihet gjithmonë dhe të respektohen të drejtat e saj”, ndërsa ai përshkroi tri kushtet si “përpjekjet e Francës për paqe”.

Si Macron ashtu edhe Starmer do të shkojnë në Shtëpinë e Bardhë në fillim të javës së ardhshme për të diskutuar mbi luftën në Ukrainë.

Udhëheqësit evropianë kanë përsëritur se ata dhe Ukraina duhet të kenë një vend në tryezën e bisedimeve, pasi SHBA-ja thirri bisedimet me Rusinë në Arabinë Saudite të martën.

Takimi në Riad sinjalizoi një ndryshim tektonik në marrëdhëniet midis SHBA-së dhe Rusisë, ku të dy palët ranë dakord të rivendosin marrëdhëniet pas tre vitesh përpjekjesh të udhëhequra nga SHBA për të izoluar Rusinë.

Pas takimit, Trump bëri një sërë komentesh në të cilat dukej se fajësonte Ukrainën për pushtimin në shkallë të plotë të Moskës.

“Sot dëgjova, ‘oh, mirë, ne nuk ishim të ftuar’. Epo, ju keni qenë atje për tre vjet. Nuk duhet ta kishit filluar kurrë. Mund të kishit bërë një marrëveshje”, tha Trump.

Në përgjigje, Zelensky akuzoi Rusinë për gënjeshtra gjatë takimit të së martës.

“Me gjithë respektin e duhur për Presidentin Donald Trump si lider ai po jeton në këtë hapësirë ​​dezinformimi”, tha ai. /Telegrafi/