Lëvizja Besa: Qeverisja e tanishme nuk çan kokën për hallet e bujqve

Përmes një kumtese dërguar Telegrafit Maqedoni, Lëvizja Besa konsideron se qeverisja aktuale ”nuk çan kokë për hallet e qytetarëve të vendit, në këtë rast të bujqve.”

Ky konstatim i kësaj partie politike vjen pas dëmeve të shkaktuara nga temperaturat e ulëta, siç thonë, në mbi 90% të pemëve në rajonin e Prespës, por edhe në rajonet tjera.

Sipas tyre, ”kur kësaj i shtohet edhe fakti që ende nuk janë paguar subvencionet nga viti i kaluar, bëhet edhe më i vështirë funksionimi i bujqve dhe kjo është edhe një dëshmi se shteti shkon drejt një kolapsit total, duke mos pasur asnjë strategji të qartë për t’i dalë në ndihmë pikërisht kësaj kategorie të qytetarëve, pra bujqve, të cilët sigurojnë të ardhurat më të larta për vetë shtetin nga veprimtaria në sferën e bujqësisë, e cila është edhe dega e vetme me të cilën mund të sigurohet mirëqenia ekonomike e Maqedonisë.”

Prandaj, ”Lëvizja Besa kërkon nga autoritetet përkatëse që t’u ndalin në ndihmë bujqve dhe të mos lejojnë që, në mungesë të rendimenteve që ua dëmtoi natyra, të dëmtohen edhe nga pakujdesia e shtetit ndaj tyre. Për këtë arsye BESA apelon deri te organet kompetente që urgjentisht të dalin në vendngjarje dhe të bëjnë vlerësime për t’i rimbursuar bujqit për dëmet që i kanë pësuar nga temperaturat e ulëta të ditëve të fundit. Po ashtu apelojmë që edhe kompanitë e sigurimeve t’i përshpejtojnë procedurat për pagesat e dëmeve nga vitet e kaluara, që me këtë sadopak ta lehtësojnë ngarkesën financiare të bujqve nga dëmet që i kanë pësuar”, thuhet mes tjerash në kumtesën e Lëvizjes Besa./Telegrafi/