Largimi i billbordeve me figurën e Vuçiqit e Putinit, deklarata e ministrit Sveçla dhe e ish-drejtorit të Policisë, Qalaj

Të enjten në Zveçan janë larguar billbordet ilegale me imazhin e presidentit serb, Aleksandar Vuçiq, atij rus, Vladimir Putin e imazhe tjera në to.

Lidhur me këtë ministri i Punëve të Brendshme i Republikës së Kosovës, Xhelal Sveçla ka thënë se  simboli i vetëm i Serbisë brenda shtetit të Kosovës do të jetë ambasada e saj në Prishtinë.

“Sot në Zveçan janë larguar billbordet ilegale me simbole dhe imazhe të diktatorëve e agresorëve të cilat janë të papranueshme në Republikën e Kosovës”, ka shkruar ministri në Facebook.

Ai tutje ka thënë se Republika e Kosovës është e përcaktuar qartë për vlerat demokratike dhe orientimin euro-atlantik të saj ndërkaq si institucione mbesin të përkushtuar për rend e ligj dhe zbatim të kushtetushmërisë në çdo pjesë të vendit.

“Këto billborde e imazhe të fashistëve e agresorëve si Vladimir Putin dhe kundërshtarëve të shtetit tonë, nuk do të gjejnë vend në shtetin tonë”, ka shtuar Sveçla.

E zhvillimet e së enjtes i ka komentuar edhe ish-drejtori i Policisë së Kosovës, tash deputet i PDK-së në Kuvendin e Kosovës, Rashit Qalaj.

Deputeti opozitar e ka konsideruar veprim të duhur largimin e këtyre billbordeve ilegale, por që sipas tij prania e ministrave ka qenë e panevojshme.

“Mendoj që është veprim i duhur, por nuk e kuptoj praninë e ministrit të Brendshëm dhe atij të Administrimit të Pushtetit Lokal. Ato janë punë të institucioneve tjera dhe nuk ka nevojë që të bëhen për konsum politik”, deklaroi ai në RTV Dukagjini.

Qalaj ka deklaruar se të gjitha panot që nuk janë në frymë ligjore duhet të largohen pavarësisht se në çfarë vendi ndodhen.

“Këto punë duhet të bëhen nga institucionet përkatëse që ju takojnë dhe pa bërë shumë politikë, pasi që politizimi i tyre më pas devalvon punën e institucioneve”.

Ndërkaq, lidhur me largimin e billbordeve me imazhet e Vuçiqit dhe Putinit është deklararata edhe zëvendësdrejtori i Policisë së Kosovës në veri, Veton Elshani.

“Ne kemi qenë të njoftuar për këtë aksion dhe kemi qenë në afërsi të vendeve ku janë kryer aksionet dhe nuk ka pasur diçka të jashtëzakonshme për t’u raportuar nga ai vend”, tha Elshani në RTV Dukagjini.

Elshani thotë se Policia e Kosovës ka siguruar rrugën dhe është kujdesur që gjithçka të jetë në rregull.

“Ministria e Infrastrukturës është përgjegjëse për të gjitha rrugët magjistrale në gjithë Kosovën. Çdo banerë, reklamë apo veprimtari tjetër në këto rrugë duhet të aprovohet nga Ministria e Infrastrukturës. Ministria e Infrastrukturës e ka parë që këta banerë janë të kundërligjshëm dhe ne kemi asistua për të vendosur ligjshmërinë”.

Zëvendësdrejtori i Policisë së Kosovës në veri ka thënë se ata janë të gatshëm që kurdo që institucionet e vendit kërkojnë asistencë ata të ofrojnë. /Telegrafi/