Laporta zbuloi dy emra të mundshëm për trajnerin e ri të Barcelonës dhe shpjegoi largimin e Xavit

Presidenti i Barcelonës, Joan Laporta, ka folur për herë të parë për mediat spanjolle për largimin e Xavi Hernandez dhe ka folur për emrat që mund ta pasojnë atë në stolin e skuadrës katalunase.

Xavi njoftoi largimin e tij nga Barcelona javën e kaluar, një lajm që tronditi tifozët, por edhe publikun e futbollit në mbarë botën, pasi dukej se mesfushori legjendar do të qëndronte gjatë në këtë projekt.

Megjithatë, Xavi vendosi të largohej dhe presidenti i Barcelonës, Joan Laporta foli për herë të parë për situatën dhe shpjegoi se si erdhi ndarja.

Lexo po ashtu Xavi tregon momentin se kur vendosi të jap dorëheqje si trajner i Barcelonës

“Në asnjë rast nuk do ta shkarkoja Xavin. Ai erdhi dhe tha se është më mirë për të që të largohet dhe se do të heqë dorë nga viti i fundit i kontratës me klubin. Unë i thashë që e pranoj atë formulë – të qëndroj deri më 30 qershor”, ka thënë fillimisht Laporta për RAC1.

Mediat përmendën dy emra të pasardhësve të mundshëm në bankinën e klubit. Hansi Flick, i cili prej kohësh ka qenë dëshira e parë e Laportës dhe Rafa Marquez.

Lexo po ashtu Kandidati për trajner te Barcelona do të ndahet me klubin në fund të sezonit

“Menaxheri i ri do të jetë ai që do të vendosë Deco. Ai duhet ta vendosë këtë, por trajneri duhet të ketë një rekord të caktuar, nëse nuk marrim një vendim më kreativ”.

“Nëse do të jetë Hansi Flick, duhet ta pyesni Decon për këtë. Por, Rafa Marquezin nuk mund ta përjashtoj”, përfundoi presidenti i Barcelonës.

Pas 22 xhirove të luajtura në La Liga, Barcelona është vetëm në vendin e katërt me 10 pikë më pak se lideri Real Madrid dhe duket se lufta për titull tashmë i ka kaluar të shkuarës. Përpara tyre janë edhe Girona dhe Atletico Madrid. /Telegrafi/