Kurti njoftoi se është hap tenderi për banim të përballueshëm, opozita e quan tentativë për mashtrim

Kryeministri i Kosovës, Albin Kurti, ka bërë të ditur përmes një postimi në Facebook se është hapur tenderi për ndërtimin e objekteve për banim të përballueshëm në katër komuna: Pejë, Gjilan, Podujevë dhe Istog.

Projekti ka një vlerë prej mbi 38 milionë euro dhe synon të sigurojë strehim më të përballueshëm për qytetarët.

Ky hap i qeverisë ka shkaktuar reagime të menjëhershme nga opozita.

Deputetja e PDK-së, Blerta Deliu-Kodra, ka kritikuar projektin duke e cilësuar atë si një farsë.

Në një reagim në Facebook, ajo ka theksuar se ka mungesë të rezultateve konkrete gjatë mandatit të qeverisë.

Lexo po ashtu Kurti njofton se kanë hapur tenderin për ndërtimin e objekteve për banim të përballueshëm

“Për katër vjet, nën qeverisjen e tyre, u shtrenjëtua çdo produkt dhe kosto e jetesës u rrit. Mbi 250 mijë të rinj e lanë Kosovën në kërkim të një jete më të mirë jashtë saj. Sonte, pas katër viteve premtim, Kryeministri po prezanton një tjetër ‘dokument’ për banesat e përballueshme. Për 48 muaj, nuk ishin në gjendje një urë 13 metra me ndërtu, e po ndërtojnë diçka më shumë,” ka shkruar Deliu-Kodra.

Nga ana tjetër, anëtari i Kryesisë së LDK-së, Berat Rukiqi, e ka quajtur këtë njoftim një “tentativë për mashtrim”. Ai ka theksuar mungesën e projekteve konkrete gjatë mandatit të qeverisë dhe e ka akuzuar atë për fillim të procedurave pa rezultate reale.

“4 vjet asnjë punë, asnjë projekt. Tash, në tentativë për mashtrim: 1. Nisje të themelimit për themelim. 2. Fillim procedurash për nisje të procedurave,” ka shkruar Rukiqi./Telegrafi/