Kurti në Konventën e Klubit të Prodhuesve: Jeni shtyllë e shoqërisë dhe ekonomisë, do ta keni vëmendjen maksimale të Qeverisë

Kryeministri i vendit, Albin Kurti në Konventën e prodhuesve të organizuar nga Klubi i Prodhuesve të Kosovës (KPK) tha se prodhuesit janë pjesa më e rëndësishme e shoqërisë, të cilët përkundër vështirësive kanë vazhduar të investojnë në Kosovë.

Kurti prodhuesit vendor i ka quajtur shtyllë e shoqërisë dhe ekonomisë, ndërsa premtoi se do ta kenë vëmendjen maksimale të qeverisë që ai udhëheqë.

Kryeministri në Konventën e Klubit të Prodhuesve të Kosovës, tha se do ta largojnë tarifën dhe do ta zbatojnë reciprocitetin si bazë mbrojtëse për prodhuesit.

“Parimet e reciprocitetit që do të nxjeren nga Qeveria e Kosovës do të jenë të bazuara ne parimet e Organizatës Botërore të Tregtisë (OBT) dhe në CEFTA”, tha Kurti, duke bërë të ditur se tashmë është themeluar grupi punues për vlerësimin e masave mbrojtëse të reciprociteti dhe sa ta marr rekomandimin do të vendosë për këtë çështje, raporton Telegrafi.

“Rozeta tashmë ka marrë vendim për të krijuar grupin punues me anëtarët nga Departamenti i Tregtisë, Oda Ekonomike e Kosovës, Oda e Afaristëve të Kosovës, Dogana, AVUK-u dhe Klubi i Prodhuesve te Kosovës. Ky grup do të përmbledhë te gjitha barrierat tregtare me Serbinë dhe do të vijë me rekomandim te qeveria. Porsa të vijnë në zyrën time këto rekomandime do t’i analizojmë dhe do të marrim vendim për largim të tarifës dhe vendosje të reciprocitetit. Ne jemi shtet i pavarur dhe sovran dhe do të veprojmë si të till”, ka shtuar ai.

Kryeministri më tej shtoi se pabarazia dekurajon për garën.

“Ju keni vite që më keni thënë se keni problem në sigurimin e tregut dhe qasjen në financa, por erdhi dita që ta heqim monopolin dhe qasjen në financa. Po ashtu do të lehtësohet qasja në fonde për bujqit”, tha ai.

Shefi i ekzekutivit të vendit tha se investime të huaja ka pak se ka pasur korrupsion dhe kanë frikësuar investitorët potencial.

“Nuk është problem në raportim të korrupsionit se sa në atë se çfarë do të ndodhë”, tha ai. /Telegrafi/