Lajme Kosovë

Kurti: Gjermania dhe Kosova kanë të njëjta synime “një Evropë të lirë që jeton në paqe”

Kryeministri Albin Kurti ka thënë se Gjermania dhe Kosova janë të bashkuara nga të njëjta synime për një Evropë të lirë, që jeton në paqe.

Kështu tha në një konferencë për media, kryeministri i Kosovës, Albin Kurti pas takimit me kancelarin gjerman, Olaf Scholz.

Ai tha se kjo është vizita e parë e kancelarit gjerman në Kosovë, Olaf Scholz.

Sipas tij, Kosova është në momente shumë të rëndësishme, vendimtare dhe se kancelari gjerman siç tha ai ka treguar vizion të qartë.

“Kjo është vizita e parë e kancelarit gjerman. Jemi në momentin vendimtar për vendin tonë. Pikërisht në këtë kohë të trazuar kur kemi nevojë për lidership të qëndrueshme, kancelari ka treguar vizion të qartë në mbrojtjen e vlerave tona të përbashkëta të drejtave civile. Gjermania dhe Kosova janë të bashkuara nga të njëjta synime për një Evropë të lirë, që jeton në paqe. Mijëra ushtarë gjerman kanë shërbyer në Kosovë prej dy dekadash në kuadër të NATO-s. Kanë kaluar 22 vjet prej se Gjermania dhe 18 vendet tjera anëtarë të NATO-s janë bërë bashkë për të ndaluar gjenocidin në Kosovë, që solli katastrofë humanitare. Jemi përjetë mirënjohës…Sot jemi dy ditë larg nga dita e ‘Çlirimit të Kosovës’, dita kur trupat e NATO-s hyn në Kosovë. Na kujtohen dhe pamjet e Kosovës, gjithçka ishte djegur dhe shkatërruar. BE llogariti se rindërtimin e Kosovës së shkatërruar duheshin mbi 4 milionë dollarë”, ka thënë Kurti.

Kryeministri po ashtu tha se më 22 qershor Bundestagu gjerman pritet të votojë për vazhdimin e mandatit të pjesëtarëve të ushtrisë gjermane në forcën mbrojtëse të KFOR-it.

Kurti u shpreh se do ta mirëpret votimin për vazhdimin e mandatit duke pasur parasysh rëndësinë e këtyre trupave në Kosovë.

“Sot sigurova kancelarin se përkundër rrethanave të vështira socio-ekonomike qeveria jonë po vazhdon me reforma të përgjithshme. Ne vazhdojmë, jo vetëm që të forcojmë mekanizmat e sundimit të ligjit por edhe kulturën demokratike në vend. Po punojmë për përmbushjen e reformave të nevojshme për anëtarësim në BE. Kërkesa nga Gjermania për mbështetjen e Kosovës në Këshillin e Evropës ka hasur në mirëkuptim të plotë. Do të vazhdojmë me aspiratën tonë për anëtarësim në BE, ku planifikojmë të aplikojmë në fund të këtij viti.

Më 22 qershor Bundestagu gjerman pritet që të votojë për vazhdimin e mandatit të pjesëtarëve të ushtrisë gjermane në forcën mbrojtëse të KFOR-it. Do ta mirëpresim votimin për vazhdimin e mandatit duke pasur parasysh rëndësinë e këtyre trupave në Kosovë. Në këtë drejtim me rëndësi të madhe dhe nevojë urgjente është anëtarësimi i Kosovës në programin e partneritetit për paqe, NATO dhe sërish kërkova nga Gjermania si anëtare e NATO-s, të na mbështetës në këtë rrugëtim të anëtarësimit. Edhe ne po i shtojmë kapacitetet tona mbrojtëse, në këtë vit kemi shtuar buxhetin për 52 për qind”, theksoi ai.

Ai po ashtu tha se Serbia është duke vazhduar të bllokoj proceset edhe përkundër marrëveshjeve të arritura, siç është “Marrëveshja me targat”.

“Sa i përket çështjes së Dialogut Kosovë-Serbi… Kosova është treguar palë kreative, konstruktive e përkushtuar, por Serbia fatkeqësisht po vazhdon të bllokoj zgjidhjet që ne i ofrojmë dhe në kuadër të procesit të Berlinit. Kjo vërehet së fundi nga ‘marrëveshja mbi targat’ dhe situatën me koston për energjinë”, tha ndër të tjera kryeministri Kurti. /Telegrafi/