Sport Rishikime

Ku do të luajë Kaka sezonin e ardhshëm?

Para 14 vitesh

Një numër spekulimesh nga mediumet spanjolle flasin se Real Madridi do ta vë në shitje mesfushorin kreativ, superyllin brazilian, Leite Kaka, ndërsa klubet me të cilat ai është lidhur janë të shumta.

Superylli brazilian erdhi në Santiago Bernabeu në vitin 2009, si pjesë e planit multimilionësh të Florentino Perezit për të rifilluar fitimin e titujve. Sidoqoftë, Kaka ka zhgënjyer tërësisht, ndoshta kjo për shkak të lëndimeve të cilat e kanë përcjellur.

28 vjeçari duhet të marrë një vendim verën e ardhshme dhe ai ose mund të qëndrojë te Los Blancos për të rigjetur formën më të mirë, ose do të bëjë një hap tutje në karrierën e tij, pasi klube nga Brazili, Anglia, Italia dhe Rusia janë duke e monitoruar për së afërmi situatën.

Milan	Braziliani e filloi karrierën e tij evropiane te Milani dhe klubi rossoner zë një vend të rëndësishëm në zemrën e tij. Zëvëndëspresidenti i Milanit, Adriano Galliani deklaroi kohë më parë se Milani nuk do ta rikthejë Kakan në skuadër, mirëpo pak kush dyshon se një gjë e tillë nuk do të mirëpritej nga tifozët Rossoner.
Inter	Kampioni aktual i Italisë, Inter, është një opsion tjetër për Kakan nëse ai dëshiron të rikthehet në Apenine. Massimo Moratti tashmë ka konfirmuar se po monitorohet situata e mesfushorit te Real Madridi, ndërsa transferimi i tij te Interi për të do të ishte gjë e madhe. Sidoqoftë, është pak e besueshme se Kaka do t’i bashkohej rivalit të përbetuar të klubit që ai do më së shumti.
Roma	Është pak e mundur që Roma të ketë paratë për ta joshur Kakan që ai të largohet nga Real Madridi, por gjërat mund të ndryshojnë në kryeqytetin italian në të ardhmen e afërt. Pritet që Roma të shitet së shpejti, ndërsa ringjallja Giallorose planifikohet të bëhet me shumë para. Dhe me Carlo Ancelottin si favorit për postin e trajnerit të Romës, mund të krijohen kushtet që Kaka të jetojë në kryeqytetin e Italisë.
Man City	Manchester City ishte i gatshëm të paguante rreth 100 milionë euro për brazilianin para se ai të transferohej te Real Madridi. ‘Qytetarët’ nuk janë dorëzuar ende dhe vazhdojnë ta ndjekin situatën. Atyre tashmë u mungon një mesfushor natyral ofensiv dhe Kaka është njeriu ideal për ekipin e Cityt, i cili viteve në vijim do të luftojë për titujt kryesorë.
Chelsea	Një klub tjetër që ka kërkuar shërbimet e mesfushorit fantastik është Chelsea. Gjigantët londinezë mezi presin që t’i shtojnë një dozë kreativitet ekipit të tyre dhe e konsiderojnë Kakan si transferin e përkryer. Prezenca e brazilianëve si David Luiz dhe Ramires mund të jenë ndihmesë në tentimet për transferimin e Kakas.
Blackburn Rovers	Çfarë ka të bëjë këtu Blackburni, në një listë për të ardhmen e Kakas? Përgjigja është e thjeshtë – Blackburn është skuadër e interesuar për të joshur emra të mëdhenj gjatë verës, sidomos ata me origjinë braziliane. Transferimi i Kakas duket i pa mundur për Roversat, por ata pa dyshim se mund të tentojnë një gjë të tillë.
Real Madrid	Edhe pse Jose Mourinho duket se e preferon gjermanin Mesut Ozil si mesfushor ofensiv, Kaka mund të vendosë për të qëndruar në Santiago Bernabeu. Ish-heroi i Milanit do të ketë minutazhë të mjaftueshme nëse qëndron edhe pse ai jo gjithmonë do të jetë titullar. Mbetet të shihet nëse Kaka është në gjendje të pranojë një status të tillë në skuadër.
Rubin Kazan	Një spekulim më herët gjatë javës sugjeroi se Rubin Kazan është në gjendje të ofrojë 45 milionë euro për Kakan edhe pse zëdhënësi i superyllit brazilian e mohoi një gjë të tillë. Paratë nuk janë problem për rusët, por duket shumë pak e mundur që Kaka të largohet nga klubi aktual për një aventurë të ftohtë ruse.
Corinthians	Corinthians ia ka arritur të joshë lojtarë të tillë si Ronaldo (origjinali) dhe Robero Carlos, në vitet e fundit të karrierës së tyre. Mbetet të shihet nëse Kaka dëshiron të rikthehet në Amerikën Latine. Pos kësaj, një rikthim në klubin e tij të vendlindjes, Sao Paulo, duket më realist.
Sao Paulo	Sao Paulo është klubi ku Kaka filloi shkëlqimin e tij para kalimit në Evropë dhe është çështje kohësh kur Kaka do të rikthehet te klubi i tij i fëmijërisë. Megjithatë, për të mund të duket shumë herët për t’u rikthyer në vendlindje, pasi ndjen se ka edhe ca vite të mira të mbetura në Evropë.