KSA e Kosovës “Titiste” dhe ajo e sotme “Ahtisariane”

Kallëzimi aktual penal i deputetit Nahit Hasani , ndaj veprimtarisë së dyshimtë kriminele dhe antikombëtare të disa personaliteteve të elitës politike shqiptare të ish regjimit të atëhershëm komunist, që nga viti 1945, e deri më vitin 1999 në Kosovë (perioda pas bombardimeve të NATO-s), më shtyri që, pa e komentuar këtë Kallëzim nga këndvështrimi juridik, politik, historik dhe moral , të bëjë vetëm një krahasim kuriozitar të asaj kohe të shkuar të periodës komuniste të Kosovës “titiste” dhe kësaj të sotmes: Republikës së Kosovës “ahtisariane”

Në vazhdim, do t’i parashtroj disa hamendësime si paralelizma të ngjashmërive të mundshme në mes të KSA e Kosovës “titiste” (deri në periodën milosheviqiane-1989) dhe Kosovës sot, si shtet thuaja, të pavarur dhe sovran “ahtisarian”. Kuptohet, me këtë rast, kurrsesi nuk insistoj që me këto krahasime patjetër të pajtohen plotësisht me mua të gjithë lexuesit.

1. Në shtetin e sotëm të pavarur “ahtisarian” të Republikës së Kosovës, pa dyshim, ne si shqiptar i gëzojmë të gjitha të drejtat politike, dhe, ngjashëm ato ju garantohen edhe pakicave tjera kombëtare. A nuk ishte kështu edhe në KSA të Kosovës “titiste”?

2. Në shtetin e sotëm të pavarur “atisarian” të Republikës së Kosovës, ne e kemi kushtetutën, i kemi institucionet tona, flamurin shtetëror dhe të drejtën e përdorimit paralel të flamurit kombëtar! A nuk ishte kështu ngjashëm edhe në KSA të Kosovës “titiste”?

3. Në shtetin e sotëm të pavarur “ahtisarian” të Republikës së Kosovës, ne konsiderohemi si bashkësi multietnike. A nuk e kishim si të ngjashëm vëllazërim – bashkimin edhe në kohën KSA të Kosovës “titiste”?

4. Në shtetin e sotëm dhe të pavarur “ahtisarian” të Republikës së Kosovës, ne sot në pushtet i kemi njerëzit që me pushkë në dorë luftuan për çlirimin e Kosovës dhe bashkimin e saj me shtetin amë Shqipërisë. A nuk është kjo rrethanë e ngjashme me partizanët në KSA të Kosovës “titiste” që me pushkë në dorë e luftuan fashizmin dhe në Konferencën e Bujanit u deklaruan për të drejtën e popullit shqiptar për vetëvendosje dhe mundësinë e bashkimit me shtetin amë Shqipërisë? Por, me të ardhur në pushtet, si ata partizan dikur, ashtu edhe këta sot, e harruan atë synim si moto kryesore të luftës së tyre , dhe, përkundrazi, u angazhuan në pamundësimin e realizimit të tij;.

5. Në shtetin e sotëm të pavarur “ahtisarian” të Republikës së Kosovës , në pushtet e kemi klanin e Drenicës-Llapit. A nuk ishte kështu ngjashëm edhe në KSA të Kosovës “titiste”, kur në pushtet sundonte elita e klanit gjakovar?

6. Në shtetin e sotëm të pavarur “ahtisarian” të Kosovës Republikë, 28 Nëntorin, ditën e flamurit, nuk e kemi me ligj si festë shtetërore. A nuk ishte kështu edhe në KSA të Kosovës ”titiste”?

7. Në shtetin e sotëm të pavarur “ahtisarian” të Kosovës, si prioritet dhe obligim e kemi aplikimin pa kusht të programin qeveritar të kthimit të serbëve të shpërngulur nga Kosova. A nuk kishim një program të tillë në formë të kthimit të qëndrueshëm të serbëve dhe malazezëve në Kosovë, edhe në kohën e KSA të Kosovës “titiste” ?

8. Në shtetin e sotëm të pavarur “ahtisarian” të Republikës së Kosovës, në pushtet e kemi elitën politike servile vendore që me konsekuenc e zbaton në praktikë këtë planë! A nuk e kishim kësi elite të ngjashme politike vendore edhe në kohën e KSA të Kosovës “titiste”?

9. Në shtetin e sotëm të pavarur “ahtisarian” të Republikës së Kosovës, si mbikëqyrje përmbi kok, e kemi EULEX-in dhe bashkësinë ndërkombëtar. A nuk kishim diçka të ngjashme si mbikëqyrje nga Federata dhe republikat tjera të Jugosllavisë (posaçërisht të Serbisë) edhe në KSA të Kosovës “titiste”?

10. Në shtetin e sotëm të pavarur të Kosovës “ahtisariane”, si institucionin në cilësinë e mbrojtjes civile dhe katastrofave natyrale, e kemi FSK-në. A nuk kishim diçka të ngjashme, si: Mbrojtjes civile dhe territoriale, edhe në kohën e KSA të Kosovës “titiste”?

11. Në kohën e KSA të Kosovës “titiste”, burgjet ishin përplot me shqiptar, sot janë përplot me ish pjesëtarë të UÇK-së dhe ndonjëherë edhe me aktivist të lëvizjes “Vetëvendosje”, të cilët, haptas kërkojnë, shkruajnë dhe brohorisin në rrugë: “jo negociata me Serbinë”, “vetëvendosje”, “jemi një” etj.

Në Kosovën e sotme “ahtisariane” bile kemi edhe disa specifika të disfavorshme si margaritarë që nuk i kishim fare në KSA të Kosovës “titiste”. Ta zëmë:
– Atëherë, i kishim fabrikat tona që punonin dhe një ekonomi sado qoftë të fuqishme; sot, asnjë uzinë nuk e kemi funksionale dhe ekonomia e Kosovës është në kolaps;
– Atëherë, të gjitha kishat ortodokse serbe, ishin nën kompetencat e organeve tona krahinore të Kosovës dhe nuk i ruante askush me polic; të shpallura si zona të veçanta të mbrojtura, sot më nuk janë nën kontrollin tonë dhe kudo afër tyre mund të hasësh nga 4-5 policë roje;
– Atëherë, nuk kishim enklavat njënacionale, sot i kemi me bollëk…e kishim Kosovën në kufijtë e veta të përcaktuara administrative si tërësi, sot nuk e kemi…

Sikur po vërehet nga këto krahasime të çuditshme, si në kohën e pavarësisë “ahtisariane” të Kosovës shtet sot, ashtu edhe të asaj të KSA të Kosovës “titiste” dikur, shqiptarët mund të lypin gjithçka dhe të kenë çdo gjë, por kurrsesi dhe në asnjë mënyrë nuk guxonin të kërkonin të drejtën e tyre të garantuar edhe me dokumentet dhe kartat tjera ndërkombëtare, sikurse është e drejta për vetëvendosje dhe mundësia e bashkimit me Shqipërinë?!

Një kërkesë të tillë popullore, sot në Kosovën “ahtisariane”, bile-bile, e kemi të ndaluar edhe me Kushtetutë??!
Por, për fund, sido që të jetë, edhe përpos këtyre krahasimeve, padyshim se, të gjithë sot duhet të jemi të kënaqur që, mbi të gjitha, tanimë nuk e kemi “SHKAUN” MBI KOKË!