Kryeprokurori për deklaratat e Kurtit: Fare nuk më interesojnë – ligji vlen edhe për zyrtarët shtetërorë

Kryeprokurori i Prokurorisë Speciale, Blerim Isufaj në një konferencë për media është përgjigjur ndaj deklaratave të kryeministrit Albin Kurti, ndonëse jo në mënyrë direkte.

I pyetur nga gazetarët rreth ftesës për intervistim ndaj Kurtit dhe deklaratës së tij që pret prokurorët në zyrë ta intervistojnë, Kryeprokurori Isufaj u shpreh se “ligji është i njëjtë për të gjithë qytetarët, përfshirë edhe zyrtarët e lartë shtetëror”.

“Ftesa për të dhënë dëshmi është një procedurë e rregullt, dhe çdo person që ftohet ka përgjegjësi ligjore që të bashkëpunoj me institucionet e drejtësisë. Iu bëjë thirrje të gjitha institucioneve publike përfshirë edhe qeverinë që të tregojnë përkushtim ndaj sundimit të ligjit dhe të shmangin retorikën që synon politizimin e drejtësisë”, tha Isufaj.

Ai tha se nuk është këtu për të komentuar deklaratat e askujt.

“Nuk jam këtu për të komentuar deklaratat e askujt,sepse fare nuk më interesojnë. Prokuroria Speciale nuk janë për të bërë skenarë, ne punën tonë e kemi të përcaktuar me ligj dhe Kushtetutë dhe nuk bëjmë dallime as për nga pozita as për nga emri. Nuk kam informacione nesh dikush është intervistuar ndonjëherë në zyrën e kryeministrit, ndoshta mund edhe të ketë por unë nuk di”, tha Isufaj.

Lexo po ashtu Kurti, Prokurorisë Speciale: Unë guxoj t’ju them s’po vij, ta shohim tash a guxojnë ata të vijnë te unë

Rreth deklaratës së Kurtit ku prokurorët e Kosovës, i ka quajtur si “kërmij”, dhe “lepuj”, Isufaj u shpreh se deklaratat e tilla minojnë integritetin e sistemit të drejtësisë.

“Deklaratat denigruese dhe fyerjet publike ndaj prokurorëve dhe institucioneve të prokurorisë jo vetëm që minojnë integritetin e sistemit të drejtësisë por e cenojnë edhe besimin e publikut në sundimin e ligjit”, tha Isufaj.

Kryeprokurori shtoi se aktualisht kemi ngritur aktakuzë për 5 ish-ministra të kabineteve tjera qeveritare dhe nuk e kemi të ngritur asnjë aktakuzë për asnjë ministër aktual

“Kemi të hedhura 17 kallëzime penale për ministrat aktual në detyrë. Ky është shembulli më i mirë që ne nuk punojmë në mënyrë selektive, ne punojmë vetëm në bazë të provave. Kjo nuk do të thotë që në të ardhmen nuk do të ketë aktakuzë edhe për ministrat aktual”, tha ai. /Telegrafi/