Kryeministri i ri britanik njofton ndryshimin e parë në politikën e vendit

Kryeministri britanik, Keir Starmer, ka njoftuar se po anulon politikën e diskutueshme të paraardhësit të tij për të dërguar azilkërkuesit në Ruanda, megjithëse ai paralajmëroi se nuk do të ndodhë shpejt.

“Skema e Ruandës ishte e vdekur dhe e varrosur përpara se të fillonte”, tha Starmer në konferencën e tij të parë për shtyp që kur Partia Laburiste largoi Konservatorët nga pushteti pas 14 vjetësh.

Sesioni 30-minutësh i pyetjeve dhe përgjigjeve pasoi mbledhjen e tij të parë të kabinetit ndërsa qeveria e tij e re merr përsipër sfidën masive për të rregulluar një grumbull problemesh të brendshme dhe për të fituar një publik të lodhur nga vitet e kursimit, kaosi politik dhe një ekonomi e goditur.

“Ne kemi një punë të madhe për të bërë, kështu që tani ne vazhdojmë me punën tonë”, u tha Starmer gazetarëve.

Bëhet e ditur se Kabineti Starmer ka një numër rekord grash – 11 nga 25 ministra, shkruan AP, përcjell Telegrafi.

“Jam krenar për faktin që kemi njerëz rreth tryezës së Kabinetit që nuk e kanë pasur fillimin më të lehtë në jetë”, tha Starmer.

Ndër një sërë problemesh që ata duhet të trajtojnë janë nxitja e një ekonomie të plogësht, rregullimi i një sistemi të kujdesit shëndetësor dhe rivendosja e besimit te qeveria.

“Vetëm sepse laburistët fituan një rrëshqitje të madhe nuk do të thotë se të gjitha problemet me të cilat është përballur qeveria konservatore janë zhdukur”, tha Tim Bale, profesor i politikës në Universitetin Queen Mary të Londrës.

Lexo po ashtu Keir Starmer, zyrtarisht kryeministri i ri britanik

Starmer në fjalët e tij të para si kryeministër veçoi disa nga çështjet e mëdha, të tilla si rregullimi i Shërbimit Shëndetësor Kombëtar, sigurimi i kufijve të MB-së, fluksin e emigrantëve që ikin nga lufta, varfëria si dhe thatësira, valët e të nxehtit dhe përmbytjet që i atribuohen ndryshimeve klimatike.

Ndryshe, Starmer do të ketë një orar të ngjeshur pas fushatës gjashtëjavore.

Ai niset të dielën për të vizituar secilin nga katër vendet e Mbretërisë së Bashkuar, Anglinë, Skocinë, Uellsin dhe Irlandën e Veriut.

Ai planifikon të takohet me kryetarët e bashkive metropolitane, pavarësisht nga partia.

Më pas ai do të udhëtojë në Uashington për një takim të NATO-s dhe do të presë samitin e Komunitetit Politik Evropian më 18 korrik, një ditë pas hapjes shtetërore të Parlamentit dhe fjalimit të mbretit, i cili përcakton axhendën e qeverisë së re. /Telegrafi/