Kriza e popullsisë dhe humbjet në Ukrainë – Putini po u kërkon grave që të kenë deri në tetë fëmijë

Presidenti rus Vladimir Putin po u kërkon grave që të kenë deri në tetë fëmijë sa numri i ushtarëve rusë të vdekur vazhdon të rritet në luftën e tij me Ukrainën, duke përkeqësuar krizën e popullsisë në vend.

Duke iu drejtuar Këshillit Popullor Botëror Rus në Moskë të martën, Putin tha se vendi duhet të kthehet në një kohë kur familjet e mëdha ishin normë, shkruajnë mediat e huaja, përcjell Telegrafi.

“Shumë nga gjyshet dhe stërgjyshet tona kishin shtatë, tetë, apo edhe më shumë fëmijë”, tha Putin.

“Le t’i ruajmë dhe ringjallim këto tradita të shkëlqyera. Familjet e mëdha duhet të bëhen normë, një mënyrë jetese për të gjithë popullin e Rusisë. Familja nuk është vetëm themeli i shtetit dhe shoqërisë, është një fenomen shpirtëror, një burim morali”.

“Ruajtja dhe rritja e numrit të popullsisë të Rusisë është qëllimi ynë për dekadat e ardhshme dhe madje edhe brezat në vijim. Kjo është e ardhmja e botës ruse, e Rusisë mijëvjeçare, të përjetshme”, vazhdoi Putin.

Deklaratat e Putinit vijnë në mes të dekadave të rënies së nivelit të lindjeve në Rusi, se pushtimi i saj në Ukrainë dhe pasojat e mëvonshme ekonomike vetëm sa janë përkeqësuar.

Dhe lufta në Ukrainë ka bërë që rreth 900,000 njerëz të largohen nga vendi.

Rreth 300,000 njerëz të tjerë janë regjistruar për të luftuar në Ukrainë, duke thelluar krizën e fuqisë njerëzore të Rusisë.

Rreth 50,000 burra rusë besohet se kanë vdekur në luftën në Ukrainë, sipas një analize statistikore të mediave ruse Mediazona dhe Meduza të kryer në korrik.

Ndërsa në tetor, Ministria e Mbrojtjes e Mbretërisë së Bashkuar raportoi se Rusia ka të ngjarë të grumbullojë deri në 290,000 ushtarë të vrarë ose të plagosur në luftën kundër Ukrainës.

Që nga ardhja në pushtet 24 vjet më parë, Putin është përpjekur të rrisë nivelin e lindjeve në Rusi duke futur një sërë stimujsh qeveritarë për ata që kanë fëmijë, duke përfshirë pagesat për familjet që kanë më shumë se një fëmijë.

Por masat kanë pasur pak ose aspak ndikim, me shifrat nga Rosstat, shërbimi federal i statistikave të Rusisë, që e vendosin popullsinë ruse në 146,447,424 deri më 1 janar, më e ulët se në vitin 1999 kur Putin u bë president për herë të parë, raportoi Le Monde.

“Rusisë i mungojnë punëtorët”, i tha AFP në shkurt Alexei Raksha, një demograf që ka punuar më parë në Rosstat.

“Është një problem i vjetër, por është përkeqësuar për shkak të mobilizimit dhe largimeve masive”.

Disa rusë kanë pretenduar se ndihma ekonomike që qeveria ka premtuar për familjet e mëdha, si parcelat e tokës, nuk u materializua kurrë, raportoi RFE/RadioLiberty në vitin 2020.

Vetë Putini përflitet se ka më shumë se katër fëmijë, megjithëse ai kurrë nuk e ka diskutuar këtë publikisht. /Telegrafi/