Krasniqi: Mbështesim marshin për drejtësi të ftuar nga “Liria ka emër”, në solidarizim me krerët e UÇK-së në Hagë

Kryetari i Partisë Demokratike të Kosovës, Memli Krasniqi, ka dalë në mbështetje të marshit për drejtësi të ftuar nga iniciativa “Liria ka emër”, në mbështetje të ish-krerëve të UÇK-së, të cilët po mbahen në Hagë.

Ky marsh i organizuar më 2 prill nga ora 14:00 në Prishrltinë nga platforma “Liria ka emër”, bëhet në solidarizim me krerët e UÇK-së një ditë para nisjes së procesit gjyqësor në Hagë.

Lexo po ashtu Në mbështetje të ish-krerëve të UÇK-së, "Liria ka emër" më 2 prill organizon marsh në Prishtinë

Krasniqi nëpërmjet një postimi në faqen e tij në Facebook, ka ftuar të gjithë qytetarët e Kosovës që t’i bashkohen këtij marshi solidarizues, për të shprehur hapur mbështetjen dhe bindjen e palëkundur mbi pastërtinë dhe drejtësinë e luftës tonë çlirimtare.

“Liria dhe pavarësia e Kosovës qëndrojnë mbi përpjekjen shekullore të popullit tonë dhe sakrificës sublime të dëshmorëve dhe pjestarëve të Ushtrisë Çlirimtare të Kosovës. Kjo e vërtetë historike është e vërteta e Kosovës. Janë nderi dhe krenaria jonë kombëtare. Sot, është obligim dhe detyrë e jona, qytetare e patriotike, që këtë të vërtetë ta mbrojmë nga çdo tendencë për tjetërsim”, ka shkruar Krasniqi.