Kosovari kapet në Durrës me pasaportë të falsifikuar

Policia shqiptare ka proceduar penalisht një shtetas të Kosovës, pasi i njëjti është kapur duke kaluar kufirin me pasaportë që dyshohet të jetë e falsifikuar.

Drejtoria Vendore e Policisë Durrës, seksioni kundër krimit ekonomik e financiar njofton se ngjarja ka ndodhur dje më 24 shtator në Portin e Durrësit.

Sipas Kodin Penal të Republikës së Shqipërisë, falsifikimi ose përdorimi i letërnjoftimeve, i pasaportave apo i vizave të falsifikuara dënohet me burgim nga gjashtë muaj deri në katër vjet dhe me gjobë nga katërqind mijë deri në një milion lekë (3-8 mijë euro).

Kur kjo vepër kryhet në bashkëpunim ose më shumë se një herë apo ka sjellë pasoja të rënda, dënohet me burgim nga gjashtë muaj deri në pesë vjet dhe me gjobë nga gjashtëqind mijë deri në dy milionë lekë, përcjell Telegrafi.

Kur falsifikimi bëhet nga personi që ka për detyrë të lëshojë letërnjoftimin, pasaportën apo vizën, dënohet me burgim nga tre deri në shtatë vjet dhe me gjobë nga një milion deri në tre milionë lekë.

Njoftimi i policisë
Më datë 24.09.2018 u referuan materialet në Prokurorinë pranë Gjykatës së Shkallës së Parë Durrës, për shtetasin F.B., vjeç 22, banues në Kosovë, pasi në PKK Port, Durrës, u kap duke kaluar kufirin me një pasaportë, e cila dyshohet të jetë e falsifikuar. Nenet 189 e 190 të Kodit Penal./Telegrafi/