Kosova shënon përparim të madh në renditjen e ligave të UEFA-s, lë mbrapa kampionatet e vendeve fqinje

Shtëpia e futbollit evropian, UEFA e ka publikuar renditjen e re të ligave të 55 anëtareve të saj, ku BKT Superliga e Kosovës ka pasur ngritje në ranglistë.

BKT Superliga e Kosovës ka bërë një përparim të jashtëzakonshëm në renditje pas publikimit të ranglistës së re.

Kampionati elitar i Kosovës tani ndodhet në pozitën e 39-të, që është pozicioni më i mirë që nga anëtarësimi në UEFA.

Lexo po ashtu Përditësohet koeficienti i klubeve në garat evropiane: Prishtina më e suksesshmja, por jo edhe Llapi

Thënë ndryshe, Kosova është ngritur për 4 pozita, duke e konfirmuar kësisoj përmirësimin e vazhdueshëm të cilësisë së futbollit në vendin tonë.

Vitin e kaluar, Kosova u përfaqësua me tri ekipe në Evropë: Prishtinën, Dritën dhe Llapin, e të cilat patën paraqitje shumë të mira, gjë e cila ka ndikuar edhe në vlerësimin e UEFA-s.

Ndërkohë, për herë të parë sivjet në garat evropiane do të paraqiten katër klube nga Kosova: tri vendet e para nga BKT Superliga dhe fituesi i Kupës së Kosovës.

Me renditjen e re, Kosova ka lënë mbrapa vendet fqinje, pasi Shqipëria ka rënë për pesë pozita dhe tani renditet e 43-ta, Maqedonia e Veriut ka rënë nëntë pozita, duke u renditur e 48-ta, derisa Mali i Zi zë pozitën e 53-të në renditje. /Telegrafi/