Kosova humb piktorin dhe akademikun e njohur, Rexhep Ferri – liderët politik e institucional vlerësojnë lart kontributin e tij

Akademiku Rexhep Ferri ka vdekur në moshën 86-vjeçare, kanë njoftuar familjarët e tij të enjten. Ferri i përket gjeneratës së artë të piktorëve kosovarë.

Kryeministri i Kosovës, Albin Kurti, përmes një letre e ka ngushëlluar familjen e profesorit të ndjerë Rexhep Ferri.

Duke shprehur ngushëllime në emër të popullit dhe Qeverisë së Kosovës, kryeministri tha se Rexhep Ferri, piktor, profesor dhe shkrimtar, ishte një figurë e ndritur e kulturës dhe artit tonë kombëtar e cila nuk do të harrohet kurrë.

“Profesori jonë i nderuar, doajeni i shquar Rexhep Ferri që nga fillimet e tij në Pejë, deri te kontributet e tij si pedagog dhe anëtar i Akademisë së Shkencave dhe Arteve të Kosovës la një trashëgimi të pasur artistike dhe edukative.

Veprat e tij janë vlerësuar lart nga kritika dhe ai ka ndihmuar në formimin dhe ngritjen e shumë artistëve të rinj. Republika e Kosovës do të përkujdeset që vepra e tij të dokumentohet, të mbrohet dhe që çdo gjeneratë e re ta njoh veprën e tij”, shkroi kryeministri Kurti në letër ngushëllim.

Familjen e Rexhep Ferrit e ka ngushëlluar edhe presidentja e vendit, Vjosa Osmani. Osmani tha se Kosova sot humbi akademikun, piktorin, poetin, prozatorin e eseistin Rexhep Ferri.

“Mjeshtëria e tij krijuese ka gërshetuar mrekullisht pikturën me letërsinë, të cilave nuk iu nda gjatë gjithë jetës. Akademik Ferri i takon brezit të artë të piktorëve të Kosovës, ndaj emri i tij do të mbetet i skalitur përherë në kujtesën tonë nëpërmjet krijimeve të tij artistike të larmishme, të cilat do të mbeten testament për ne dhe  brezat pas nesh

Ju përcjell ngushëllimet e mia më të sinqerta familjes, miqve, Akademisë së Shkencave dhe Arteve të Kosovës, si dhe komunitetit kulturor!I përhershëm qoftë kujtimi për akademik Rexhep Ferrin”, thuhet në telegramin e ngushëllimit të presidentes.

Lexo po ashtu Ndërron jetë akademik Rexhep Ferri

Edhe kryetari i Kuvendit të Kosovës, Glauk Konjufca është shprehur i pikëlluar nga vdekja e artistit, Rexhep Ferri.

Ai u ka shprehur ngushëllime familjarëve të të ndjerit, si dhe ka thënë se veprimtaria e tij e vendosi atë në mauzoleun e të pavdekshmëve.

“Sot me pikëllim të thellë e mora lajmin se ka ndërruar jetë piktori, profesori e akademiku Rexhep Ferri. Ai do t’i mungojë jo vetëm familjes së tij, miqve, kolegëve dhe bashkëpunëtorëve të tij që i pati përgjatë një jete të mbushur me krijimtari dhe punë, por do t’u mungojë të gjithëve, sepse vepra e tij që la pas është një thesar i jashtëzakonshëm”, shkroi kryeparlamentari në Facebook.

Reagim për vdekjen e Ferrit ka pasur edhe nga kryetari i PDK-së, Memli Krasniqi.

Krasniqi theksoi se veprimtaria e tij e shquar artistike dhe intelektuale do të mbetet përherë e spikatur në fushën e artit dhe kulturës sonë kombëtare.

“U pikëllova nga lajmi për vdekjen e akademikut dhe piktorit tonë të mirënjohur, Rexhep Ferri. Veprimtaria e tij e shquar artistike dhe intelektuale do të mbetet përherë e spikatur në fushën e artit dhe kulturës sonë kombëtare. Ngushëllimet më të thella për familjen, miqtë dhe bashkëpunëtorët e akademik Ferrit. Kujtimi për të do të jetojë përherë!”, shkroi Krasniqi.

Telegram ngushëllimi familjes Ferri i ka dërguar edhe kryetari i LDK-së, Lumir Abdixhiku.

Abdixhiku ka thënë se me pikëllim të thellë, morëm lajmin për ndarjen nga jeta të akademik, Rexhep Ferri. Ju humbët njeriun e dashur për ju, ndërsa Kosova humbi personalitetin e shquar të artit e pedagogun, Rexhep Ferri.

“Me punën e tij të palodhshme, akademik Ferri, gjatë gjithë jetës dha shembullin e njeriut të përkushtuar për arsimimin e brezave të rinj. Vepra e akademik Rexhep Ferri, prej pedagogu, e artisti do të kujtohet përjetësisht në historinë shqiptare. Ai do të mbetet personifikim i njeriut, që për dekada të tëra nuk pushoi së punuari për të mirën e vendit. Ndërsa, arti i tij, do të mbetet udhërrëfyes për brezat e ardhshëm, në fushën e artit, kulturës dhe shkencës”, thuhet në telegramin e ngushëllimit.

Varrimi i Ferrit do të bëhet nesër (e premte) në orën 13:00 në varrezat e Prishtinës.

Ferri u lind në Kukës të Shqipërisë në vitin 1937. Më 1958 mbaroi Shkollën e Mesme të Artit në Pejë. Në vitin 1962 botoi poezitë e para, nga cikli “Shëtitësit e lodhur” në revistën letrare “Jeta e re” në Prishtinë dhe paralajmëroi se “poezia dhe letërsia në përgjithësi do të jetë preokupimi i tij pothuaj po aq sa edhe artet pamore”, sipas biografisë të publikuar në faqen zyrtare të ASHAK-ut. /Telegrafi/