Kosova e Serbia, pa marrëveshje për njohjen reciproke të certifikatave ADR

Pa rezultate ka përfunduar takimi në mes të delegacionit kosovar dhe atij serb për njohjen reciproke mes dy shteteve të certifikatave për transportin e mallrave të rrezikshme, të njohura si ADR.

Delegacioni i Republikës së Kosovës i udhëhequr nga Ministrja për Dialog, Edita Tahiri dhe Ministrja për Tregti dhe Industri, Hykmete Bajrami së bashku me ekipin profesional morën pjesë sot në takimin e ftuar nga BE-ja, takim ky që u mbajt në Vjenë dhe ka zgjatur gjatë tërë ditës deri në orët e vona të mbrëmjes.

“Pas bisedimeve të vështira dhe përpjekjeve për të arritur marrëveshje për njohjen reciproke të certifikatave të ADR-së, ku vlen të theksohet angazhimi i Bashkimit Evropian si ndërmjetësues ishte maksimal me gjithë atë këto bisedime nuk dhanë rezultate”, thuhet në njoftimin për media të MTI-së, teksa bëhet me dije se takimet do të vazhdojnë.

“Takimi i radhës për këtë çështje do të mbahet së shpejti dhe për këtë do të presim derisa BE do të ftojë takimin e ri”.

Sipas njoftimit të MTI-së, delegacioni i Republikës së Kosovës ka qenë plotësisht i angazhuar për gjetjen e një zgjidhje të qëndrueshme që bazohet në njohjen reciproke të certfikatave të ADR-së mes dy shteteve dhe angazhimet tona për zgjidhje me dialog vazhdojnë.
“Mirëpo bëjmë me dije që masat e reciprocitetit mbeten në fuqi derisa të arrihet marrëveshja në fjalë”, thuhet në njoftim, përcjell koha.net.

Delegacioni kishte në përbërje edhe znj. Hykmete Bajrami, ministre në Ministrinë e Tregtisë dhe Industrisë, Gazmir Raci, këshilltar politik i ministres Tahiri dhe koordinator i çështjes, Fejzulla Mustafa, udhëheqës i Sektorit të Transportit të Mallrave të Rrezikshme në Ministrinë e Infrastrukturës dhe Bekim Mehmetaj, udhëheqës i sektorit IBM në Doganën e Kosovës.