Presidentja e Kosovës, Vjosa Osmani, por edhe Qeveria e Kosovës dhe kryeministri i Shqipërisë, Edi Rama, sot konfirmuan atë që dy ditë më parë raportoi Agjencia “Reuters”, se Qeveria amerikane ka zhvilluar bisedime me Kosovën dhe Shqipërinë për të strehuar përkohësisht afganët, që kanë punuar me forcat amerikane në Afganistan.

Presidentja Osmani nuk ka folur për favoret ekonomike dhe politike, që pretendohej nga agjencia britanike e lajmeve “Reuters”, për marrjen e disa mijëra afganëve, por tha se bisedimet për këtë çështje janë zhvilluar me ambasadorin amerikan në Kosovë, Philip Kosnett, më 16 korrik të këtij viti.

“Më 16 korrik, pak ditë pasi bota, e sidomos ne në Kosovë shënuam Ditën Botërore të Refugjatëve, jam kontaktuar nga Ambasadori i SHBA-ve në Kosovë, Philip Kosnett, i cili përcillte një kërkesë nga Presidenti Biden dhe Sekretari i Shtetit Blinken. Kërkesa kishte të bënte me strehimin e përkohshëm të afganëve, civilë të pafajshëm, të cilët tani ishin në shënjestër të Talibanëve, vetëm sepse kishin qëndruar në anën e aleatëve tanë, në anën e paqes e demokracisë, në anën e barazisë e të drejtësisë. Ata ishin punëtorët lokal që kishin punuar bashkë me forcat amerikane, si dhe familjet e tyre, përfshirë fëmijë”, ka thënë sot presidentja Osmani, përmes një postimi në Facebook.

​Strehimi i afganëve në Kosovë, Osmani: Kam dhënë pëlqimin tim për një veprim të tillë humanitar ​Strehimi i afganëve në Kosovë, Osmani: Kam dhënë pëlqimin tim për një veprim të tillë humanitar

Ajo tha se pa asnjë hezitim apo kushtëzim të vetëm, ka dhënë pëlqimin për një operacion të tillë humanitar, “duke u nisur së pari nga parimi njerëzor se nuk i mbyllen dyert atyre që pa fajin e dëshirën e tyre janë të detyruar të lënë vatrat e tyre për t’i ikur përndjekjeve dhe për të shpëtuar jetë; së dyti, për shkak se si anëtare e denjë e komunitetit të shteteve të lira, Kosova e respekton të drejtën ndërkombëtare dhe obligimin që rrjedh nga ajo për mos t’i mbyllur derën refugjatëve; dhe e treta, për shkak se ne duhet t’u qëndrojmë miqve tanë, e sidomos Shteteve të Bashkuara në krah, ashtu siç na qëndruan ata neve në të mirë e në të keq”, tha Osmani, raporton Telegrafi.

Edhe Qeveria e Kosovës konfirmoi sot nga mesi i korrikut janë në diskutim me autoritetet amerikane sa i përket strehimit të afganëve, që kanë bashkëpunuar me Shtetet e Bashkuara të Amerikës.

Luan Dalipi, shef i stafit të kryeministrit të Kosovës, tha se “gjithçka do të përmbyllet mirë”.

“Që nga mesi i korrikut jemi në komunikim dhe bashkëpunim të vazhdueshëm me autoritetet shtetërore dhe ushtarake amerikane për këtë çështje të dhimbshme e të ndjeshme. Ka shumë punë logjistike e teknike, të sigurisë dhe sociale, që po i trajtojmë me kujdes. ShBA-të janë aleati ynë kryesor dhe partneri ynë strategjik. Gjithçka do të përmbyllet mirë”, tha Dalipi për Telegrafin.

Qeveria e Kosovës: Jemi në komunikim me SHBA-në për mundësinë e strehimit të afganëve Qeveria e Kosovës: Jemi në komunikim me SHBA-në për mundësinë e strehimit të afganëve

Strehimin e afganëve në Kosovë e ka përkrahur edhe Lideri i Aleancës për Ardhmërinë e Kosovës, njëherësh ish-kryeministri i Kosovës, Ramush Haradinaj, i cili tha Kosova duhet vullnetarisht të strehojë afganët që kanë bashkëpunuar me SHBA-në.

“Kosova të jetë vullnetare në strehimin e disidentëve afganë dhe të jetë pranë Shteteve të Bashkuara të Amerikës, ashtu siç ishin ata pranë nesh, kur riatdhesuam shtetasit e Kosovës nga Siria”, shkroi Haradinaj në Facebook.

Lajmin se Shtetet e Bashkuara kanë kërkuar të sjellin përkohësisht në Shqipëri e në Kosovë qindra afgan, e ka komentuar edhe kryeministri i Shqipërisë Edi Rama.

Ai ka dhënë detaje ka thënë se pjesën e madhe të afganëve në rrezik për jetën të mbetur në mëshirë të fatit e kërkoi qeveria e tij.

“Përtej moralit në vetvete të kësaj fabule njerëzore, ca shqipo mendjefikur e harrojnë se ne jemi kaherë aleatë të Shteteve të Bashkuara, jo vetëm kur na duhen për hallet tona, siç na u deshën bombat e tyre për t’u mbrojtur nga spastrimi etnik i Slobodan Milosheviqit; siç na u desh zëri i tyre i superfuqishëm për ta hapur rrugën e pavarësisë së Kosovës apo për ta anëtarësuar Shqipërinë në NATO; siç na duhet gjithnjë mbështetja e tyre për të forcuar pozitat tona kombëtare e shtetërore, po edhe kur ne u duhemi atyre ndonjëherë, jo për t’i shpëtuar ata siç ata na kanë shpëtuar ne në kthesa historike, por për t’u gjendur në krah të tyre kur edhe ata, ja që ndodh, kanë nevojë për diçka të vogël prej nesh”, ka shkruar Rama në Facebook, përcjell Telegrafi.

​Strehimi i afganëve në Shqipëri, Rama: Numrin më të madh të tyre e kërkuam ne ​Strehimi i afganëve në Shqipëri, Rama: Numrin më të madh të tyre e kërkuam ne

Ai ka shtuar se nuk e di nëse amerikanët i kanë kërkuar edhe Kosovës të strehojë afganët që u ekspozuan si miq dhe mbështetës të ushtrive aleate.

“Uroj që në rast se po, Qeveria e Kosovës të përgjigjet pozitivisht, për nderin e saj e të Kosovës sigurisht”, ka shkruar ai.

Në Afganistan, militantët talibanë po marrin me shpejtësi kontrollin nga forcat qeveritare, teksa forcat ndërkombëtare, të udhëhequra nga Shtetet e Bashkuara, kanë nisur tërheqjen.

Lajmet e fundit nga ky shtet thonë se edhe presidenti i këtij vendi Ashraf Ghani është larguar tashmë nga Afganistani.

Shtetet perëndimore janë duke përshpejtuar përpjekjet për të larguar stafin e ambasadave të tyre në Kabul, teksa talibanët kanë hyrë në periferi të kryeqytetit afgan, pasi kanë marrë kontrollin e shumicës së territorit të Afganistanit.

Zyrtarët amerikanë janë cituar të kenë thënë më 15 gusht se diplomatët po evakuohen me helikopterë nga Ambasada amerikane dhe po dërgohen për në aeroport.

Mediat kanë raportuar se helikopterët janë parë duke fluturuar nga Ambasada amerikane, si dhe janë parë edhe automjete të blinduara.

Ndërsa, shumë afganë që kanë punuar me forcat e huaja kanë frikë nga hakmarrja e militantëve talibanë për shkak të punës së tyre.

Departamenti amerikan i Shtetit ka shpallur një program të ri i cili u mundëson mijëra afganëve mundësinë të zhvendosen si refugjatë në SHBA.

Mijëra afganë që do të jenë pjesë e këtij programi duhet të barten në një shtet të tretë, dhe të presin për 12 deri në 14 muaj derisa të analizohet gjithë aplikacioni. /Telegrafi/