Koreja e Jugut ka filluar të heqë altoparlantët e propagandës përgjatë kufirit të saj me Korenë e Veriut në një përpjekje për të ulur tensionet.
Ministria e Jugut sqaroi se ky veprim shënoi një "masë praktike që synonte lehtësimin e tensioneve", por nuk ndikoi në gatishmërinë e ushtrisë së saj.
Ministria nuk dha detaje specifike mbi procesin e heqjes, as nuk sqaroi nëse altoparlantët mund të riinstalohen nëse tensionet rriten përsëri, përcjell Telegrafi.
Para çmontimit të altoparlantëve, nuk kishte pasur komunikim midis dy Koreve, tha zëdhënësi i ministrisë Lee Kyung-ho.
Altoparlantët përdornin propagandë anti-koreano-veriore dhe këngë K-pop përtej kufirit, një veprim që preku “nervat” ndërsa qeveria e Kim kishte intensifikuar fushatën e saj për të hequr ndikimin e kulturës dhe gjuhës pop të Koresë së Jugut.
Pas zgjedhjes në qershor, qeveria e re liberale e Jugut vendosi t'i fikë altoparlantët, në një lëvizje për të ringjallur dialogun dhe për të rindërtuar besimin me Phenianin.
Qeveria e mëparshme konservatore i kishte ndezur ato në qershor 2024 dhe kishte bërë transmetime çdo ditë, në hakmarrje për Korenë e Veriut që fluturonte balona të mbushura me mbeturina përtej kufirit.
Fushatat e luftës psikologjike në stilin e Luftës së Ftohtë rritën më tej tensionet tashmë të përshkallëzuara nga programi bërthamor në përparim i Koresë së Veriut dhe përpjekjet e Koresë së Jugut për të zgjeruar stërvitjet e përbashkëta ushtarake me Shtetet e Bashkuara dhe bashkëpunimin e tyre trepalësh të sigurisë me Japoninë.
Presidenti i Koresë së Jugut, Lee Jae Myung, zëvendësoi konservatorin e rrëzuar Yoon Suk Yeol pasi fitoi zgjedhjet e parakohshme në qershor.
Ai ishte zotuar të përmirësonte lidhjet me Phenianin, i cili reagoi me zemërim ndaj politikave të ashpra të Yoon dhe refuzoi të angazhohej në dialog.
Koreja e Veriut nuk ka komentuar ende mbi vendimin e fundit të Koresë së Jugut. /Telegrafi/
