Presidentja e vendit, Vjosa Osmani, ka thënë se do të vazhdojë me takime me përfaqësuesit e subjekteve politike për të gjetur një zgjidhje në konstitumin e Kuvendit.
Në konferencën për shtyp pas takimit me presidentin e Këshillit Evropian, Anonio Costa, presidentja Vjosa Osmani është përgjigjur në pyetjen e gazetares së Telegrafit lidhur me ftesën e saj për subjektet politike për të gjetur një zgjidhje në konstituimin e Kuvendit.
“I falënderoj liderët e parive politike që janë përgjigjur pozitivisht. Ky është veç fillimi i një serie takimesh. Varësisht se si do rrjedhin bisedimet nesër ne do të vazhdojmë takimet, qoftë në atë format apo të ngjashme me liderët e partive. Ne si institucion i presidencës jemi në zbatim të detyrave kushtetuese. Sepse siç e dini, neni 84 përcakton që presidentja e vendit ka për detyrë që të garantojë funksionimin kushtetues të institucioneve, tha Osmani, për Telegrafin.
Ajo tha se “mos konstituimi i Kuvendit rrezikon pikërisht funksionimin kushtetues të institucioneve”.
“Kjo edhe është arsyeja pse i kam ftuar liderët për të diskutuar, por nuk do të doja t’i paragjykoj rezultatet. Shpresoj se secili do të angazhohet duke vënë interes parësor interesin e vendit”, tha ajo.
Tutje ajo tha se "Kosova ka nevojë sa më parë për Kuvend, në qoftë se për asgjë tjetër, për atë që e diskutuam me Costan, në mënyrë që të ketë vendim të Kuvendit të Kosovës sa i përket Planit të Rritjes, por ka edhe shumë marrëveshje ndërkombëtare. Nëse nuk ratifikohen së shpejti, pëson Kosova, shteti dhe qytetarët tanë”.
Kosova ndodhet në ngërç institucional pas zgjedhjeve të fundit parlamentare të 9 shkurtit 2025.
Pavarësisht 15 tentimeve për të konstituuar Kuvendin, procesi ka mbetur i bllokuar për shkak se partia që ka dalë e para në zgjedhje - Lëvizja Vetëvendosje nuk po arrin t’i siguroj votat e mjaftueshme për zgjedhjen e kryeparlamentares, ndërsa partitë që gjatë legjislaturës së kaluar kanë qenë në opozitë nuk po pajtohen për ta votuar të propozuaren e kësaj partie, Albulena Haxhiun.
Në përpjekje për të tejkaluar këtë situatë, presidentja Vjosa Osmani, ka ftuar liderët e subjekteve parlamentare në një takim konsultativ më 15 maj. /Telegrafi/
