Komuna e Gjilanit liron përkohësisht nga pagesa e gjobës qytetarët që i kanë lajmëruar me vonesë lindjet dhe vdekjet e familjarëve

Komuna e Gjilanit ka marrë vendim që t’i lirojë përkohësisht nga obligimi i pagesës së gjobës komunale qytetarët të cilët kanë regjistruar lindjet dhe vdekjet pas kalimit të afatit ligjor.

Sipas vendimit, lirimi nga pagesa e gjobës aplikohet për regjistrimet e mëvonshme vetëm gjatë vitit 2023.

Në arsyetimin e vendimit thuhet se Drejtoria për Administratë të Përgjithshme në vazhdimësi pranon kërkesa nga qytetarët për regjistrime të lindjeve dhe vdekjeve pas kalimit të afatit ligjor prej 30 ditësh.

Në këto raste sipas Ligjit për taksa, ngarkesa dhe gjoba komunale është paraparë shqiptimi i gjobave sipas periudhave të caktuara kohore të skadimit të afatit ligjor për regjistrim.

“Për shkak të situatës së krijuar si pasojë e pandemisë globale Covid-19, informimit jo të mjaftueshëm të qytetarëve lidhur me shqiptimin e gjobës si dhe kushteve të rënda ekonomike që vështirësojnë kryerjen e këtij obligimi, tanimë evidentohet një numër i konsiderueshëm i rasteve të paregjistruara të lindjeve dhe vdekjeve”, thuhet në arsyetimin e vendimit.

Tutje, komuna ka bërë të ditur se ky vendim merret me qellim që brenda një afati gjatë vitit 2023, të regjistrohen lindjet dhe vdekjet e paregjistruara deri më tani duke evituar pagesën e gjobës vetëm gjatë kësaj periudhe si dhe në mënyrë që ky vendim të shërbejë si fushatë vetëdijesimi për regjistrimet e tilla brenda afatit ligjor në të ardhmen. /Telegrafi/