Me koeficientin e ri, Presidentes i rritet paga për 90 euro, Kryeministrit dhe Kryeparlamentarit nga 85 euro

Qeveria e Kosovës e ka miratuar të martën projektligjin për buxhetin e vitit 2024 në vlerë prej 3.3 miliardë euro.

Kryeministri i Kosovës, Albin Kurti, në mbledhjen e Qeverisë tha se për sektorin publik, koeficienti i pagave për vitin 2024 do të jetë 110 euro.

E me rritjen e koeficientit tashmë siç është e rregulluar me ligj, rriten edhe pagat në sektorin publik.

Rritjen më të madhe të pagave, do ta kenë ata që e kanë koeficient më të lartë.

Në bazë të ligjit në Kosovë koeficientin më të madh e ka Presidentja e Kosovës (18).

Paga e Presidentes me rritjen e koeficientit të pagave nga 1890 euro sa e ka aktualisht, shkon në 1,980 (90 euro rritje).

Paga e kryetarit të Gjykatës Kushtetuese nga 1837 euro, shkon në 1925 euro (88 euro rritje).

Paga e kryeministrit, kryetarit të Kuvendit, kryetarit të Gjykatës Supreme, Kryeprokurorit të Shtetit rritet për 85 euro (nga 1,785 euro shkon në 1,870 euro).

Paga e deputetëve dhe ministrave rritet për 82 euro (nga 1,722 euro shkon në 1,804 euro).

Paga e kryetarit të Prishtinës dhe komandantit të FSK-së rritet për 75 euro (nga 1,575 euro shkon në 1,650 euro).

Paga e ushtarit të FSK-së rritet për 28 euro (nga 588 euro shkon në 616 euro).

Paga e gardianit të burgut rritet për 27.5 euro (nga 577.5 euro shkon në 605 euro)

Paga e policit dhe zjarrfikësit rritet për 25 euro ( nga 525 euro shkon në 550 euro).

Paga e rektorit të UP-së rritet për 71 euro (nga 1491 shkon në 1562 euro)

Paga e profesorit universitar rritet për 62 euro (nga 1302 euro shkon në 1364 euro)

Paga e mësimdhënësit të shkollës së mesme të lartë rritet për 29 euro (nga 609 euro shkon në 638 euro)

Paga e mësimdhënësit të shkollës së mesme të ulët rritet për 28 euro (nga 588 euro shkon në 616 euro)

Paga e edukatorit rritet për 26 euro (nga 546 euro shkon në 572 euro)

Paga e mjekut specialist rritet për 60 euro (nga 1,260 euro shkon në 1,320 euro)

Paga e infermierit rritet prej 25 deri 30 euro.

Koeficientet e të gjitha kategorive të sektorit publik mund t’i shihni në Gazetën Zyrtare./Telegrafi/