Kinezi konsumoi para kamerës sasi shumë të madhe alkooli, ishte e fundit – u gjet i vdekur pas transmetimit të drejtpërdrejtë

“Livestreamer” kinez ka vdekur menjëherë pasi u pa duke pirë sasi të mëdha alkooli në Doujin, një aplikacion kinez i ngjashëm me TikTok, raportoi BBC.

Një përdorues i quajtur “Vëllai i 3000” ka pirë të paktën shtatë shishe pije alkoolike kineze baijiu gjatë transmetimit direkt në kanalin e tij, transmeton Telegrafi.

Ai u gjet i vdekur 12 orë më vonë, pas transmetimit të drejtpërdrejtë, raportojnë mediat kineze.

Vdekja e tij nxiti thirrje për një mbikëqyrje më të fortë të qeverisë mbi industrinë në rritje të transmetimit të drejtpërdrejtë.

Ëang (34) është i njohur për pirjen e pijeve alkoolike kineze gjatë transmetimeve të drejtpërdrejta, dhe baijiu përmban deri në 60 për qind alkool.

Rrjeti Doujin ka ndaluar tashmë pirjen gjatë transmetimit të drejtpërdrejtë, me gjoba që variojnë nga një ndalim i përkohshëm në një ndalim të përhershëm nga aplikacioni.

Ëang iu ndalua aplikacioni para se të fillonte të pinte, por ai hapi llogari të reja dhe i anashkaloi rregullat. Ai u ndoq nga 44,000 njerëz në llogarinë e tij të fundit.

Një raport nga autoritetet kineze zbuloi se më shumë se një miliard përdorues të internetit ishin aktivë në platforma video të shkurtra si Doujin, një industri me vlerë rreth 28 miliardë dollarë. /Telegrafi/