Femra Familja Në çift

Katër gabimet e femrave në herën e parë

Para 7 vitesh

Cilat janë gjërat që NUK duhet të bëni kur flini për herë të parë me të dashurin?

Ka shumë gjëra që luhen në mes, kur flini për herë të parë me të dashurin tuaj. Dhe nuk është thjesht çështje kënaqësie seksuale. Seksi bashkë ju njeh me një anë tjetër të partnerit dhe të vetes tuaj; ju krijon një afrimitet të ri, i cili mund t’ju lidhë më shumë me njëri-tjetrin, por nga ana tjetër, mund t’ju largojë.

Mund të mos jetë përvoja më e mirë seksuale që do të keni me njëri-tjetrin, por funksionon si një lloj ‘parathënieje’ të asaj që do të vijë më pas.

Që hera e parë të mos ndikojë për keq në lidhjen tuaj, ja çfarë duhet të mos bëjnë femrat kur kryejnë marrëdhënie për herë të parë:

1. Të përpiqeni të krijoni skena prej pornostar-esh

Është e kuptueshme që çdo femër dëshiron t’i lërë të dashurit një shije të mirë gjatë herës së parë, por e mira është që t’ia lini disa gjëra imagjinatës. Kur kryeni për herë të parë marrëdhënie, ju ende nuk e njihni egon seksuale të partnerit ndaj nuk mund të eksperimentoni menjëherë me pozicionet seksuale apo me të brendshme lëkure alla ‘50 hijet e Greit’.

Këto gjëra lërjani të ardhmes. Sa për fillim, qëndroni tek teknikat klasike dhe përqendrohuni që në herët e para të njihni mirë shijet e partnerit.

2. Të kryeni marrëdhënie pa mbrojtje

I njëjti arsyetim si në rastin e parë: në herën e parë zakonisht nuk dini pothuajse asgjë për zakonet seksuale të të dashurit tuaj. Nuk mund ta dini përshembull, nëse atij i pëlqen që kur është i lirë, të kërkojë kënaqësi në vajza që ndoshta i njeh prej 2 ditësh.

Këto zakone janë një rrezikshmëri për t’u infektuar nga sëmundjet seksualisht të transmetueshme ndaj është shumë e rëndësishme të jeni të blinduara! Nga ana tjetër, nëse ai është një djalë tipikisht ‘i mirë’, mund të ketë njëfarë kohe pa kryer marrëdhënie dhe ju nuk do të donit një fëmijë prej tij që në fazat e para të lidhjes.

3. Të silleni si e turpshme të nesërmen në mëngjes

Ti je një vajzë e rritur, dhe ke marrë një vendim prej të rriture kur vendose të kalosh natën me të dashurin tënd. Nuk ka asgjë për t’u ndjerë në siklet të nesërmen. Është e natyrshme që të ndihesh çuditshëm pasi ke kryer marrëdhënie për herë të parë, por duhet të përpiqeni të dukeni po aq të sigurta në vetvete edhe të nesërmen në mëngjes. Mos kini frikë ta puthni, ta ngacmoni të dashurin tuaj.

Dhe diçka tjetër e rëndësishme: mos i jepni të kuptojë nëse keni pasiguri për trupin tuaj: ai ka qenë brenda tij, ju ka parë dhe ju ka ndier. Nëse i jepni të kuptojë se ndiheni çuditshëm do ta bëni edhe atë të ndihet në siklet, sa mund të trembet për të pasur një përvojë të dytë.

4. Ta zgjasni shumë qëndrimin me të

Ka shumë ndjenja që ndërthuren brenda të dyve ju gjatë herës së parë. Dhe me shumë mundësi njëra prej tyre është të doni të rrini sa më gjatë pranë tij. Nëse jeni në shtëpinë e tij, kaloni pak kohë së bashku në mëngjes, gatuani diçka për të ngrënë, por mos kaloni aty gjithë paraditen sidomos kur ai ka edhe gjëra të tjera për të bërë. Kështu që thojini se ju duhet të ikni, falënderojeni për natën e kaluar bashkë dhe vazhdoni edhe ju jetën tuaj.

Në këtë mënyrë i tregoni se edhe ju keni të tjera prioritete në jetë përveç tij, të cilat nuk kanë ndryshuar vetëm sepse kryet marrëdhënie me të. /Telegrafi/