Katër bankat më të mëdha të Greqisë, mund të humbasin rreth 15.5 miliardë euro në kapital deri në 2020, apo 9% të kapitalit në një skenar ekonomik negativ, sipas rezultatit të “stress testit” të publikuar nga Banka Qendrore Europiane (BQE).
Prova e rezistencës, që synon zbulimin e mungesës në kapital përpara se Athina të dalë nga programi i shpëtimit prej 86 miliardë euro në Gusht, u ndërmor në mënyrë të ndarë nga testimi i huadhënësve të tjerë të Eurozonës. Prova për 33 bankat e tjera të rajonit do të publikohet në Nëntor.
Testi i institucionit në Frankfurt ndaj 4 bankave më të mëdha të Greqisë; Pireaus, NBG, Eurobank dhe Alpha, u zhvillua më herët për t’i dhënë kohë huadhënësve që të mbushin ndonjë mungesë në kapital përpara se Athina të dalë nga programi i ndihmave. Ndër huadhënësit, Alpha Bank pati performancën më të mirë, ndërkohë që raporti i mjaftueshmërisë së kapitalit (CET1), do të binte me 8.56% në 9.7%, në një skenar negativ. Për Eurobank, raporti i kapitalit bazë kundër aktiveve të ponderuara me risk do të reduktohej me 8.68% në 6.75%. NBG do të pësonte një rënie me 9.56% në 6.9%, ndërsa Pireaus, një humbje me 8.95% në 5.9%.
Bankat e Greqisë janë rikapitalizuar 3 herë që prej krizës së borxhit në vitin 2010 dhe mbajnë ende një barrë prej 96 miliardë euro të borxhit të keq. Këto janë angazhuar në reduktimin e kësaj shifre drejt 65 miliardë euro deri në vitin 2019. Ushtrimi i muajit maj ishte i katërti gjatë krizës 8-vjeçare të borxhit.
Rikapitalizimi i parë u ndërmor në 2013-ën, ku një fond i shpëtimit të bankave, i financuar nga huadhënësit e Eurozonës dhe FMN, injektoi 25 miliardë euro drejt 4 bankave, ndërkohë që 3.5 miliardë euro të tjera u gjeneruan nga investitorë privatë.
Pas kontrollit të 2014-ës, bankat shtuan 8.3 miliardë euro nga investitorët privat. Por kjo dështoi një vit më vonë kur qeveria e re e majtë në Greqi u përplas me kreditorët, duke shkaktuar tërheqjen e shpejtë të depozitave, gjë që solli kontrollet e kapitalit. Bankat ndërmorën një tjetër test dhe rikapitalizim në vitin 2015, duke sjellë humbje të mëdha për aksionerët. /Telegrafi/
