Kastro Zizo rrëfen njohjen me ‘Missin’ dhe tregon skenën romantike të vendosjes së unazës

I ulur në gjunjë duke i vendosur unazën e fejesës një bukurosheje, Klevis Bega (Kastro Zizo) arriti të shkaktojë sërish zhurmë në rrjetet sociale.

Për njohjen, lidhjen me “Miss Shqipërinë 2016”, Kristiana Skura, a do të ketë një martesë të tretë për kantautorin dhe si nis e përfundon një dashuri për të, i rrëfen në intervistën për “Panorama Plus”.

Para pak ditësh postove një foto në “Instagram”, ku i vendosje unazën “Miss Shqipëria 2016”, Kristina Skurës. Ishte skenë reale apo shaka nga ato të tuat?

Unë bie në dashuri në “vite tek” dhe martohem në “vite çift”, kështu që realiteti është subjektiv gjithmonë! Se fundja, çfarë është reale?! Më thuaj çfarë?!

Mund të na e thuash ç’të lidh me Kristiana Skurën, si e bëre për vete?

Kanë filluar të më pëlqejnë ishujt grekë. Dhe ajo është lindur dhe rritur atje. Kemi shumë për të folur rreth florës dhe faunës në ishujt e Egjeut.

Dhe ku u njohët?

Vitin e kaluar kur prezantoja “Miss Shqipërinë”.

Pra, jeni fejuar dhe do të martoheni?

E thashë edhe më sipër, që 2018 është numër çift.

Domethënë, do të bëhesh baba për herë të tretë?

Po, por këtë herë do të lind vetë, s’do lë më femrat të lindin. (Shaka)

Dashuria për ty si lind, zhvillohet dhe merr fund zakonisht?

Po, ka shumë degë edhe dashuria. Nuk i ngjajnë tjera-tjetrës. Megjithëse në trung janë po njësoj dhe vetëm emrat ndryshojnë. Por për fundet unë nuk shtij fall.

Në muzikë je rikthyer me një klip të ri të të titulluar “Konga e çajit”. Mos ndoshta i ke gjetur një fjalë tjetër hashashit aq shumë të përfolur këto kohë në realitetin shqiptar?

Në fakt, edhe hashashi është bimë toke, kurative dhe një qetësues natyral, ashtu si edhe çaji.

Në këtë klip të shohim në bashkëpunim me reperin e ri që njihet në muzikë si Tsunami. Pse vendose të bëje këngë me këtë djalë që në Shqipëri nuk njihej më parë?

Ai është një talent i ri, i cili meriton që t’i jepet një dorë.

Në skenat e klipit fokusohet shpesh thika si element dhe mjeshtëria e ti në përdorimin e saj. Ka lidhje me profesionin e tij jashtë muzikës?

Po, thikën ai e përdor sepse ka punuar kuzhinier… Ndërsa unë e përdor më mirë thikën edhe si armë të fortë, kur ftoj femrat për të ngrënë një darkë të gatuar nga unë. (Qesh)

I ftuar në “Top Show”, këngëtarja Lindita Theodhori u shpreh se të ndiqte si artist dhe e kishte me qejf një duet me ty. Do e pranoje?

Pse jo?! Unë, Lindita dheee… hmmmm, po i themi dhe Genës…

Të bëri përshtypja forma e saj fizike, duke pasur parasysh vitet që ka?

Në fakt është 63 vjeçe dhe duhet ta ketë diçka gjenetike. Por unë kam shumë respekt për femrat që kujdesen për veten.