“Kapja politike e KPM-së”, flet Demolli-Nimani nga Lëvizja Fol

Lëvizja FOL ka reaguar sot për vendimin e së premtes Bordit të Komisionit të Pavarur të Mediave, duke thënë se kundërligjshëm ndryshuan strukturën udhëheqëse.

Ajo theksoi se kjo u bë pa kaluar një proces i konsultimeve publike.

“Disa anëtarë të Bordit të KPM-së të cilët kundërligjshëm ndryshuan strukturat udhëheqëse të borit, para përfundimit të mandateve ligjore, ku përmes ndryshimeve aktuale të rregullores së punës së KPM-së, ata në mënyrë të kundërligjshme ndryshuan rregulloren duke mundësuar zgjedhjen e kryetarit dhe nënkryetarit brenda një muaji, para përfundimit të mandateve të tyre ligjore.

Ky akt u ndërmarrë pa kaluar një proces i konsultimeve publike, duke shkelur nenin 8 të ligjit për komisionin e Pavarur të Mediave, i cili kërkon përfshirjen e qytetarëve në ndryshimin e akteve nënligjore. Pas ndryshimit të kësaj rregullore, anëtarët e KPM-së ndryshuan strukturat aktuale të KPM-së, në kundërshtim me procedurat ligjore, duke krijuar një precedent të rrezikshëm që synon kapjen politike të institucioneve të pavarura, duke cenuar parimet e demokracisë dhe shtetit të së drejtës“, tha ajo, duke shtuar se Kuvendi ka dështuar të zgjedh anëtarët e këtij bordi para fushatës zgjedhore.

Me katër vota për, Besnik Berisha është zgjedhur kryetar i ri i Bordit të Komisionit të Pavarur për Media (KPM). Kjo pas propozimit të disa nga anëtarët në këtë institucion që kryetari të zgjidhet sot, meqenëse mandati i kryetarit, Jeton Mehetmi përfundon të martën.

Me të zgjedhur kryetari i ri, Mehemti ka kërkuar që vazhdimin e mbledhjes të bëjë Berisha.

Mirëpo, me këtë nuk u pajtuan disa nga anëtarët prezent. Sipas tyre kryearti i sapo zgjedhur sot vazhdon mandatin e tij nga dita e martë dhe jo nga sot.

Lidhur me mbledhjen e djeshme të KPM-së, ka reaguar edhe Asociacioni i Gazetarëve të Kosovës – AGK.

Në reagim thuhet se po përcjellin me shqetësim mbledhjen e sotme të Komisionit të Pavarur të Medieve, në të cilën është votuar një kryetar i ri, disa ditë para skadimit të mandatit të kryetarit aktual, Jeton Mehmeti.

“Zgjedhja e Besnik Berishës për kryetar të KPM-së ngre pikëpyetje ligjore për mënyrën e ndryshimit të Rregullores së KPM-së, e cila parasheh që kryetari i ri zgjidhet në mbledhjen e parë pasi t’i ketë skaduar mandati ose të jetë shkarkuar kryetari aktual. AGK-ja e sheh votimin e sotëm si përpjekje të hapur për politizimin dhe instrumentalizimin e KPM-së për interesa të partisë në pushtet, duke u bazuar në qëndrimet publike të iniciatorëve për ndryshimet e sotme. Komisioni i Pavarur i Medieve, si organ kushtetues, luan rol të rëndësishëm në rregullimin e skenës mediale në Kosovë dhe, si i tillë, duhet ta ruajë pavarësinë e plotë dhe të mos lejojë ndërhyrjet politike”, thuhet në reagim.

Edhe aktivistja e shoqërisë civile, Flutura Kusari ka alarmuar se propozimi për ndryshim-plotësimin e rregullores së punës së KPM-së paraqet përpjekje për “kapjen” e KPM-së.

“Kapja politike e KPM-së u kompletua. Siç ju paralajmërova: Rregullorja e re u ndryshua kundërligjshëm; Jeton Mehmeti u shkarkua De Facto nga pozita e kryetarit të KPM-së; KPM tash ka kryetar jolegjitim. Ky është sulm politik ndaj pavarësisë së Komisionit të Pavarur për Media dhe është bërë për të ushtruar presion në televizione. Ne punën tonë e kryejmë, e dokumentuam kapjen politike nga pushteti të KPM-së”, thuhet në reagimin e saj.

Komisioni i Pavarur i Mediave (KPM) është organ kompetent për rregullimin, menaxhimin dhe mbikëqyrjen e spektrit të frekuencave të transmetimit në Kosovë. Ai është themeluar në vitin 2005 dhe ka për përgjegjësi të mbajë një sistem të drejtë dhe të hapur për licencimin dhe rregullimin e shërbimeve mediale audiovizuele dhe menaxhimin e spektrit të frekuencave të transmetimit në pajtim me standardet më të mira ndërkombëtare. /KP/