Një incident tronditës në aeroportin ndërkombëtar Sheremetyevo të Moskës, ka lënë një djalë 18-muajsh refugjat iranian duke luftuar për jetën në komë, pasi një turist e hodhi me dhunë me kokë në dyshemenë e fortë të aeroportit.
Fëmija, i cili sapo kishte mbërritur në Rusi me nënën e tij shtatzënë pasi kishte ikur nga konflikti në Iran, pësoi fraktura të rënda të kafkës dhe lëndime të shtyllës kurrizore në sulmin e paprovokuar, transmeton Telegrafi.
I dyshuari, i identifikuar si 31-vjeçari Vladimir Vitkov nga Bjellorusia, u kap në pamjet e kamerave të sigurisë në sallën e mbërritjeve.
Videoja tregon Vitkov duke hedhur një vështrim përreth përpara se të kapë papritur fëmijën e vogël, i cili po qëndronte pranë një valixheje, dhe ta hedhë me forcë në tokë.
Sulmi ndodhi vetëm pak metra larg nënës së djalit, e cila po merrte karrocën e tij në atë kohë.
Shërbimet e urgjencës e çuan me shpejtësi fëmijën e plagosur rëndë në një spital lokal, ku ai mbetet në komë.
Autoritetet arrestuan shpejt Vitkovin, i cili thuhet se ishte nën ndikimin e drogës në atë kohë.
Gjurmë kanabisi u gjetën në qarkullimin e gjakut të tij dhe drogëra të tjera u zbuluan në posedim të tij.
Hetuesit po shqyrtojnë nëse sulmi ishte i motivuar nga racizmi apo i ndikuar nga faktorë të tjerë.
I dyshuari thuhet se kishte fluturuar për në Moskë nga Qiproja ose Egjipti. Kujdes pamjet e publikuara më poshtë janë të rënda dhe nuk rekomandohen për personat nën 18-vjeç. /Telegrafi/
