“Jam jashtëzakonisht ambicioz, mezi pres të fitoj trofe madhor”, fjalët e para të Mount si lojtar i Man Utd

Mesfushori i ri i Manchester Unitedit, Mason Mount ka folur për herë të parë pasi transferimi i tij në klub u konfirmua këtë të mërkurë.

Mount ka nënshkruar një kontratë afatgjatë në Old Trafford, duke qenë një nga objektivat kryesore të menaxherit Erik ten Hag në fillim të verës.

Ai i bashkohet klubit nga Chelsea për një tarifë prej rreth 64 milionë eurosh, plus gjashtë milionë euro tjera në formë bonuse.

Lexo po ashtu Zyrtare: Mason Mount, lojtar i ri i Manchester United

Pas konfirmimit të transferimit, 24-vjeçari ka treguar se ndihet i lumtur dhe shumë ambicioz pas transferimit në Old Trafford.

“Nuk është kurrë e lehtë të largohesh nga klubi ku je rritur, por Manchester United do të ofrojë një sfidë të re emocionuese për fazën tjetër të karrierës sime”, ka thënë fillimisht Mount.

“Pasi kam konkurruar kundër tyre, e di se sa skuadër e fortë është që po bashkohem dhe mezi pres të jem pjesë e përpjekjes së këtij grupi për të fituar trofe të mëdhenj”.

🔴 Red is the colour. #MUFC pic.twitter.com/bPznbIueoB

— Manchester United (@ManUtd) July 5, 2023

“Të gjithë mund të shohin se klubi ka bërë hapa të mëdhenj përpara nën drejtimin e Erik ten Hag. Pasi u takova me menaxherin dhe diskutova planet e tij, nuk mund të isha më i emocionuar për sezonet në vijim dhe jam gati për punën e vështirë që pritet këtu”.

“Unë jam jashtëzakonisht ambicioz; E di se sa e mrekullueshme është të fitosh trofe të mëdhenj dhe çfarë duhet për ta bërë këtë. Do të jap gjithçka për ta përjetuar atë sërish te Manchester United”, përfundoi anglezi. /Telegrafi/