Izraeli lejon ushqim ‘minimal’ në Gaza pas presionit nga aleatët, thotë Netanyahu

Kryeministri i Izraelit ka thënë se vendimi i tij për të lejuar një sasi “minimale” ushqimi në Gaza pas 11 javësh bllokadë, pasoi presionin nga aleatët në Senatin e SHBA-së.

“Nuk duhet të arrijmë në një situatë urie, si nga pikëpamja praktike ashtu edhe nga ajo diplomatike”, theksoi Benjamin Netanyahu në një video në përgjigje të kritikave për këtë veprim në Izrael, transmeton Telegrafi.

Ai tha se shpërndarjet e ushqimit do të vazhdojnë vetëm derisa ushtria izraelite dhe kompanitë amerikane të kenë ngritur qendra për të shpërndarë ndihma sipas planit të mbështetur nga SHBA-ja, të cilin OKB e ka refuzuar.

Lexo po ashtu IDF u thotë palestinezëve të evakuohen nga Khan Younis përpara një 'sulmi të paprecedentë'

Netanyahu deklaroi gjithashtu se forcat izraelite do të “marrin kontrollin e të gjitha zonave” të Gazës, si pjesë e ofensivës së zgjeruar tokësore kundër Hamasit që ushtria izraelite filloi të dielën.

Ndërkohë, sulmet ajrore izraelite vranë të paktën 20 persona në të gjithë territorin të hënën, sipas ndihmësve të parë dhe spitaleve.

Ushtria izraelite tha se kishte goditur më shumë se 160 objektiva gjatë ditës së kaluar.

Gjithashtu urdhëroi evakuimin e qytetit jugor të Khan Younis dhe periferive të tij lindore, duke i paralajmëruar banorët se ishte gati të niste një “sulm të paparë” atje. /Telegrafi/