Italiani del pozitiv për coronavirus, linë e majmunëve dhe HIV

Italia ka regjistruar rastin e parë të një pacienti që është njëkohësisht pozitiv me coronavirus, linë majmunit dhe HIV.

Bëhet fjalë për një 36-vjeçar, i cili nëntë ditë pas kthimit nga pushimet në Spanjë, ka shfaqur temperaturë, dhimbje koke, dhimbje fyti, inflamacion në ijë dhe është ndjerë i lodhur.

Siç raporton CNBC, italiani ka thënë se gjatë qëndrimit në Spanjë ka kryer marrëdhënie seksuale të pambrojtura me meshkuj. Tre ditë pas fillimit të simptomave, ai u diagnostikua me coronavirus.

Pak orë pas testit pozitiv për COVID-19, italianit iu shfaq skuqje në dorën e majtë. Pas disa ditësh, lija e majmunit u përhap në të gjithë trupin, kështu që ai u shtrua në spitalin e Katanias.

Në atë klinikë, 36-vjeçari iu nënshtrua analizave të ndryshme të cilat rezultuan pozitiv me lisë majmuni, COVID-19 dhe HIV. Testi negativ i HIV-it që bëri një vit më parë tregon se 36-vjeçari është infektuar me virus vetëm së fundmi.

Pas një jave ai doli nga spitali sepse ishte shëruar nga virusi dhe lija e majmunëve.

“Ky rast tregon se si simptomat e lisë së majmunëve dhe coronavirusit mund të mbivendosen dhe konfirmon se në rastin e bashkëinfeksionit, duhet të ekzaminohen zakonet seksuale të pacientit për të arritur në një diagnozë të saktë”, thonë studiuesit nga Universiteti i Katanias.

Studiuesit paralajmëruan se tamponi i fytit të pacientit ishte ende pozitiv pas 20 ditësh, duke treguar se personi ishte ende ngjitës.

“Duke qenë se ky është rasti i parë i një personi të infektuar me tre viruse, nuk ka prova të mjaftueshme që ky kombinim mund të përkeqësojë gjendjen e pacientit”, thonë ata. /Telegrafi/