Ismet Munishi e pranon që Prishtina nuk ishte në nivel ndaj Trepçës ‘89

Trajneri i Prishtinës, Ismet Munishi, ka folur pas barazimit me Trepçën ’89, në ndeshjen që u mbyll 2-2, duke thënë se skuadra e tij nuk ishte në nivel. 

Sipas timonierit prishtinas, ka ndikuar shumë mungesa e Kushtrim Gashit, ndërsa lavdëroi disa nga të rinjtë që u futën në pjesën e dytë.

“Nuk patëm ndeshje të mirë. Nuk ishin në nivel. Duhet ta bëjmë analizën për të parë se çka nuk ka shkuar. Nuk jam i kënaqur. Është evidente mungesa e Kushtrim Gashit, është i pazëvendësueshëm te skuadra jonë”.

“Mba na ka bërë shumë probleme dhe nuk kemi mundur ta ndalim. Edhe qarkullimin e topit nuk e kemi pasur të mirë. Ndoshta pauza na ka bërë dëm, duke luajtur një lojë, duke mos luajtur tjetrën”.

“Jam shumë i kënaqur me lojtarët e rinj. Prapashtica asistoi te goli i barazimit, por edhe Baholli e Shabanin luajtën mirë. Pavarësisht objektivave që kemi, ne duhet të shkojmë ndeshje pas ndeshje. Nuk guxojmë të vendosim objektiva. Duke arritur objektivat, duhet t’iu japim hapësirë lojtarëve të rinj”, ka thënë Munishi.

Prishtina ka 22 pikë pas këtij barazim dhe mban vendin e tretë, ndërsa Trepça ’89 me 12 pikë është në vendin e tetë. /Telegrafi/