Islami për zarfet e “helmuara”: Luftërat ushtarake me Serbinë kanë përfunduar, por jo edhe ato speciale

Eksperti i sigurisë,Avni Islami ka bërë thirrje për kujdes pas dyshimeve për sulme me helme nga Serbia.

Islami në “Dossier D” në RTV Dukagjini thotë se me të dëgjuar lajmin se disa persona nga Qendra e Numërimit dhe Rezultateve nuk ishin ndjerë mirë gjatë hapjes së zarfeve i ka shkuar në mendje sulmet me eksplozive në zarfe apo me materie të tjera kimike që janë bërë në vende të ndryshme të botës.

Ai thotë se i është kujtuar edhe helmimi masiv që u është bërë nxënësve shqiptar në Kosovë nga shërbimet sekrete serbe në vitet e ’90-ta, përcjell Telegrafi.

Eksperti i sigurisë ka thënë se është mirë të priten rezultatet nga ekspertët vendorë e ndërkombëtarë por sipas tij ky është një test i mirë për organet e sigurisë në Kosovë.

Islami ka thënë se luftërat ushtarake kanë përfunduar me Serbinë por sipas tij jo edhe ato speciale.

“Serbia do të provojë metoda të ndryshme për ta destabilizuar Kosovën në mënyrë që qytetarët e Kosovës të mos ndihen të sigurt”.

Eksperti i sigurisë thotë se personat e zgjedhur në zgjedhje e që ende nuk kanë siguri të plotë deri në konsolidimin e institucioneve, duhet të kenë kujdes të shtuar nga ndonjë sulm i mundshëm edhe të këtij lloji pra me letra apo diçka ngjashëm./Telegrafi/