“Ishin dy të verdhë”, Ancelotti thotë se do ta apelojnë kartonin e kuq të Vinicius Jr

Trajneri i Real Madridit, Carlo Ancelotti, ka deklaruar se do të apelojnë kartonin e kuq të Vinicius Junior, pasi ai u përjashtua kundër Valencias për herë të dytë në tre vjet, dhe ishte vetëm kartoni i tretë i kuq në karrierën e tij. Braziliani goditi me dy duart në kokë portierin Stole Dimitrievskit dhe u përjashtuar pas një rishikimi të VAR-it.

Fitorja e mbrëmshme e Real Madridit erdhi pas një trileri të vërtetë duke u rikthyer nga disavantazhi dhe me një futbollistë më pak për të fituar 1-2.

Megjithatë, vëmendjen e rrëmbeu pikërisht përjashtimi i yllit të Los Blancos, Vinicius Jr, i cili reagoi me agresivitet ndaj portierit të vendasve.

Dimitrievski fillimisht i tha brazilianit në fytyrë të ngrihej në këmbë, pasi ishte rrezuar në zonë dhe Vinicius pastaj përdori të dyja duart për ta goditur atë, por jo në gjoks, por në kokë.

Trajneri i Real Madridit, Ancelotti ende ndjen se reagimi nuk ishte i denjë për përjashtim duke thënë pas ndeshjes se do ta apelojnë atë.

“Ne do të apelojmë. Ajo që ne mendojmë është se nuk ishte e kuqe, ishin dy të verdhë. Ai është përjashtuar me karton të kuq, por skuadra ka reaguar ndaj kësaj vështirësie, siç ka reaguar edhe për penalltinë e humbur. Do apelojmë, nuk e di nëse do ta pranojnë. Unë nuk i kam thënë asgjë, i kam uruar lojtarët, u kam thënë të njëjtat gjëra si këtu”, ka thënë Ancelotti.

Lexo po ashtu Vinicius Jr mund të dënohet deri në 12 ndeshje për 'agresion'

“Ishte një prekje më parë nga portieri dhe më pas një shtyrje nga Vini. Mendoj se mjaftuan dy kartonë të verdhë, çështja kishte marrë fund. Nuk dua të them se ka rënë në kurth. Është përpjekur t’i bëjë gjërat mirë, si gjithmonë, herë ia del e herë pak më pak. Por mbaron këtu. Shpresoj të luaj ndeshjen tjetër. Dhe asgjë më shumë, ai vazhdon të jetë vendimtar për ne”, përfundoi italiani.

Pas ndeshjes, Vinicius shkoi në rrjetet sociale për t’u kërkuar falje bashkëlojtarëve të tij, por ai mund të jetë jashtë fushës shumë kohë. Nëse apelimi i tyre nuk rezulton i suksesshëm, braziliani do të përballet me një pezullim nga katër deri në 12 ndeshje për veprimet e tij. /Telegrafi/