BE i IOC i jep përparësi barazisë gjinore, për herë të parë bartës të flamurit do të jenë një femër dhe një mashkull

Bordi Ekzekutiv i Komitetit Olimpik Ndërkombëtar (IOC) në ditën e dytë të mbledhjes që u mbajt në Llozanë të Zvicrës ka marrë dy vendime të rëndësishme para Lojërave Olimpike Tokio 2020.

Vendimet kanë të bëjnë me barazinë gjinore, e cila sipas presidentit të IOC-ut, Thomas Bach, për herë të parë në histori do të jetë e pranishme në 48.8 për qind të pjesëmarrjes së femrës.

Për herë të parë së paku një femër dhe një mashkull do të jenë pjesëmarrës nga secili prej 206 ekipeve të Komiteteve Olimpike Kombëtare, përfshirë edhe Ekipin Olimpik të Refugjatëve.

Po ashtu, është ndryshuar edhe rregulli që i lejonte ekipet Olimpike të kenë vetëm një bartës të flamurit në ceremoninë hapëse. Prej tash, një femër dhe një mashkull së bashku do të bartin flamurin gjatë ceremonisë hapëse të Lojërave Olimpike.

“Ne inkurajojmë të gjitha Komitetet Olimpike Kombëtare që ta përdorin këtë mundësi. IOC është duke dërguar një mesazh të fortë në botë, pasi barazia gjinore është realitet në Lojërat Olimpike”, ka thënë presidenti Bach.

Sipas IOC, ata janë duke punuar bashkarisht me Federatat Ndërkombëtare, në mënyrë që barazia e plotë gjinore të ndodh në Lojërat Olimpike Paris 2024.