Interi synon transferimin e dyshes franceze Tolisso-Giroud

Interi thuhet se nuk ka hequr dorë nga sulmuesi i Chelseat, Olivier Giroud dhe se kanë shtuar yllin e Bayern Munichut, Corentin Tolisso në listën e dëshirave të tyre.

Sipas mediumit italian Gazzetta dello Sport, Interi po kërkon një tjetër fitues të Kupës së Botës për të forcuar skuadrën e tyre për sezonin e ri.

Giroud tashmë ishte në shënjestër dhe dukej se ishte i destinuar të transferohej këtë dimër, por transferimi nuk u realizua kurrë.

Lexo po ashtu Giroud: Kam bërë gjithçka në janar që të largohesha nga Chelsea, Interi ishte shumë i interesuar

Gazeta pretendon se Antonio Conte nuk ka hequr dorë nga sjellja e ish-yllit të Arsenalit te Nerazzurrët dhe pret që ai të bëjë një tjetër tentativë gjatë verës.

Përveç Giroud, një emër i ri është shtuar në listën e dëshirave dhe ai është Tolisso, i cili thuhet se është në dispozicion për 35 milionë euro.

Conte gjoja u përpoq të sillte mesfushorin e Bayernit te Chelsea dhe tani Gazzetta dello Sport sugjeron që trajneri italian të tentojë mesfushorin këtë verë.

Tolisso arriti në Bavari nga Lyoni në korrik të 2017 për 41.5 milionë euro dhe ka luajtur 68 ndeshje, duke kontribuar me 14 gola dhe 12 asistime në të gjitha garat. /Telegrafi/