Vendimi i Inigo Martinez për t’u larguar drejt Al-Nassr ishte i vështirë për t’u pranuar nga shumëkush te Barcelona, përfshirë edhe tifozët e klubit.
Qendërmbrojtësi veteran ishte një lojtar kyç sezonin e kaluar, por zgjodhi ta përfundonte aventurën e tij në Kataloni për të vazhduar karrierën në Arabinë Saudite.
Martinez ka folur tashmë për këtë lëvizje gjatë një interviste për Jijantes. Ai pranoi se ishte një vendim shumë i ndërlikuar, por ndjen se ishte i duhuri për të.
“Nuk ishte e lehtë, duhej ta merrja vendimin shumë shpejt. Në atë moment i falënderova klubit për lehtësimin e largimit tim, jo të gjithë e bëjnë këtë”.
“E ndjeja veten si një prej tyre, e dashuroja të shkoja çdo ditë atje. Në fakt, sa herë fitonim, unë isha ai që sillte kroasantët të nesërmen”.
“Janë detaje që ndikojnë shumë në dhomën e zhveshjes. Një dhomë zhveshje shumë e re, me pak përvojë”.
“Në moshën tënde, përpiqesh t’i mbështesësh dhe gjithmonë jam ndier i dashur prej tyre”, ka thënë Martinez fillimisht.
34-vjeçari gjithashtu zbuloi arsyet e largimit të tij, duke treguar edhe bisedën që kishte me trajnerin Hansi Flick, i cili ishte në mosbesim, gjë që ishte e pritshme duke marrë parasysh deklaratat publike të trajnerit.
“Vitin e kaluar ishte më i miri në karrierën time dhe mendoja se do të ishte shumë e vështirë ta përsërisja të njëjtin nivel edhe një vit tjetër”.
“E pata bisedën me Hansin pranë njërës prej daljeve të emergjencës së avionit (në kthim nga Koreja e Jugut). Biseduam për situatën dhe trajneri mbeti i habitur. I thashë se kisha një ofertë që e konsideroja të parefuzueshme”, përfundoi ai./Telegrafi/
