Iniciativa CorrWatch: Të anulohet emërimi i Irafan Lipovicës si drejtor i Akreditimit, ishte proces i parregullt dhe i paligjshëm

Iniciativa CorrWatch ka shprehur shqetësim lidhur me emërimin e Drejtorit të Përgjithshëm të Akreditimit, Irfan Lipovicës që funksionon në kuadër të Ministrisë së Industrisë, Ndërmarrësisë dhe Tregtisë.  

CorrWatch thekson se ka reaguar publikisht edhe më 26 nëntor 2024 duke kërkuar rishqyrtimin e procesit.

“Kjo pasi që CorrWatch kishte evidentuar se MINT ka shkelur Ligjin për Zyrtarët Publikë, duke përfshirë në listën e ngushtë kandidatë që nuk i kanë plotësuar kriteret e përcaktuara në shpalljen e konkursit, veçanërisht kërkesat për përvojën e punës në pozita drejtuese.

Në listën e ngushtë të rezultateve të verifikimit paraprak ishin përfshirë dy kandidatë, por vetëm njëri prej tyre i kishte plotësuar kushtet ligjore. Përkundër kësaj, në vend se të anulohej procesi për shkak se kishte vetëm një kandidat i cili kishte plotësuar kriteret, dy kandidatët u shpallën fitues për të kaluar në fazën finale të emërimit”, thuhet në reagim.

Lexo po ashtu Emërimi i Irfan Lipovicës drejtor i Akreditimit, reagon IKD: Qeveria promovon zyrtarë të dyshuar për keqpërdorim të parasë publike

Iniciativa CorrWatch thekson se pavarësisht shqetësimeve të ngritura dhe shkeljeve të identifikuara, Qeveria ka emëruar njërin nga kandidatët, duke legjitimuar një proces të parregullt dhe të paligjshëm.

“Ky emërim jo vetëm që legjitimon një procedurë të paligjshme, por gjithashtu shkel parimet e integritetit dhe meritokracisë në administratën publike. CorrWatch kërkon anulimin e menjëhershëm të këtij emërimi dhe një reflektim dhe përgjegjësi institucionale mbi shkeljet e evidentuara”, thuhet në reagim. /Telegrafi/