Incidente të rënda në Beograd: Serbët therin dy tifozë rusë, ndërsa përpiqen tua lënë fajin shqiptarëve?!

Dy tifozë të Spartak Moskës janë therur me thikë në Beograd, bëjnë të ditur mediat serbe. Autoritetet e atjeshme kanë konfirmuar lajmin, mirëpo nuk kanë dhënë detaje të tjera rreth ngjarjes.

Po ashtu, edhe Ambasada ruse në Beograd e ka konfirmuar lajmin për lëndimin e dy qytetarëve rusë në qendër të kryeqytetit serb, ndërsa tashmë është bërë edhe identifikimi i tyre.

Crvena Zvezda dhe Spartak Moska të shtunën mbrëma kanë zhvilluar një ndeshje miqësore dhe incidentet kanë ndodhur pas takimit.

Të dy tifozët e therur me thikë janë dërguar urgjentisht në spital, ndërsa njëri prej tyre është në gjendje të rëndë shëndetësore.

Agjencia Tass bën të ditur se edhe disa tifozë të tjerë janë ankuar për sulme dhe se një femër i ka thënë policisë se e kanë gjuajtur me gurë, pasi mbante flamuj të Crvena Zvezdës.

Informacionet e para të agjencisë ishin se tifozët rusë u therën nga tifozët e Partizanit, derisa Kurir e ka cituar një tifoz rus të ketë thënë se nuk ishin në pyetje tifozët e njohur si “Grobari”, porse rusët janë therur nga shqiptarët.

Ndryshe, Zvezda e fitoi me rezultat 2-1 ndeshjen miqësore që u zhvillua në stadiumin Marakana. /Telegrafi/