IKSHP: Nëse nuk ndërmerren masa emergjente kundër ndotjes së ajrit, gjendja mund të përkeqësohet (Video)

Antigona Dervishaj, specialiste e shëndetit publik nga Instituti Kombëtar i Shëndetësisë Publike të Kosovës në një intervistë për Telegrafin me gazetarin Muhamet Hajrullahu, ka folur për gjendjen e cilësisë së ndotjes së ajrit në kryeqytet.

Dervishaj ka thënë se ndotësi më i madh i ajrit në kryeqytet është KEK-u.

“Qytetarët me të drejtë frikohen për ndotjen e ajrit. Kemi tejkalime të vlerave të ndotjes. 50-70% kemi ndotje nga KEK-u, 10-15% ndotja na vije nga makinat e vjetra, nuk pastrohen rrugët, kemi vende të pakta gjelbëruese, dhe ngrohja me qymyr në sezonin e dimrit”, ka thënë Dervishaj.

Dervishaj theksoi se nëse nuk nëse nuk vetëdijesohemi të gjithë, nëse nuk shtrihet kogjenerimi, nëse nuk ndalohet përdorimi i veturave të vjetra atëherë edhe vitin e ardhshëm do të kemi përkeqësim të situatës.

Ajo ka shtuar se për të parandaluar këtë nuk është dashur që qytetarët të lejohen të blejnë thëngjill.

“Zgjidhja më e mirë do të ishte shtrirja e kogjenerimit. Edhe bizneset janë ndotës të ajrit, të cilët përveç drurëve, thëngjillit përdorin edhe mjete të tjera për ngrohje siç janë gomat”, u shpreh Dervishaj.

Dervishaj shtoi se edhe viteve të kaluara kemi pasur të dhëna të njëjta me këto sot për ndotjen e ajrit, dhe nuk është ndërmarr ndonjë iniciativë.

“Ne si institut i kemi njoftuar të gjithë akterët relevant, ata arsyetohen se kanë 1% prej buxhetit për ambientin dhe nuk mund të bëjnë diçka”, tha Dervishaj.

Ajo u shpreh se për të penguar ndotjen e ajrit duhet të përdorim trafikun urban, masë tjetër është kontrolla teknike e veturave dhe përdorimi i katalizatorëve, të kemi paraqitje ditore të rezutltateve që qytetari të jetë i informuar me kohë. /Telegrafi/