“Humbëm kontrollin”, Ten Hag flet pas barazimit me Sevillan

Trajneri i Manchester United, Erik ten Hag fajësoi fatin e keq për fundin e mjerueshëm në barazimin 2-2 me kundërshtarët e tyre, Sevillan, në çerekfinalen e Ligës së Evropës.

Duke kaluar 2-0 me Marcel Sabitzer, United pësoi dy autogola në minutat e fundit nëpërmjet Tyrell Malacia dhe Harry Maguire për të përfunduar ndeshjen e parë me rezultat 2-2. Për t’i bërë gjërat më keq për Unitedin, ishte një dëmtim i rëndë i pësuar nga Lisandro Martinez .

“E kishim ndeshjen në dorë. Ishim në epërsi 2-0 dhe duhej të kishim shënuar tre ose katër gola – ndeshja ishte plotësisht mbi ne. Momente të pafat me lëndime, na u desh të bënim disa zëvendësime dhe më pas humbëm kontrollin”, ka thënë fillimisht Ten Hag pas ndeshjes.

Lexo po ashtu Manchester United shokohet në ‘Old Traford’, dy gola në fund ia mohojnë fitoren

“Ne pranuam dy autogola, ky është një fat i keq, por ne duhet të përballemi me të. Duhet të mësojmë dhe duhet ta vrasim lojën, por gjithçka është e hapur”.

“Kur nuk e shënuam të tretin dhe morëm disa lëndime, humbëm ritmin e lojës. Ne luajtëm mirë në pjesën e parë me shumë besim, shënuam dy gola të mrekullueshëm me Sabitzer dhe mund të kishim shënuar edhe më shumë, atëherë pas pjesës së parë humbëm kontrollin e lojës”.

“E di që mund të bëjmë më mirë me këta lojtarë në pjesën e fundit të lojës dhe ne duhej të ishim më të qetë, nuk ishte një natë e bukur”, përfundoi holandezi. /Telegrafi/