Human Rights Watch akuzon Izraelin për krime kundër njerëzimit për zhvendosjen e detyruar në Gaza

Izraeli po përdor urdhrat e evakuimit për të “zhvendosur qëllimisht dhe me detyrim” civilët palestinezë në Gaza, sipas një raporti të Human Rights Watch, i cili thotë se politika përbën krime kundër njerëzimit.

Grupi me bazë në SHBA njoftoi se kishte mbledhur prova që sugjeronin “krimin e luftës të transferimit të dhunshëm të popullatës civile”, duke e përshkruar atë si “një shkelje të rëndë të konventave të Gjenevës dhe një krim sipas statutit të Romës të Gjykatës Penale Ndërkombëtare“.

Raporti u publikua mes provave në rritje se Izraeli po përshpejton përpjekjet e tij për të ndarë Rripin e Gazës në dy pjesë me një zonë tampon dhe po ndërton infrastrukturë të re për të mbështetur një prani të zgjatur ushtarake.

Duke bërë thirrje që politika e Izraelit për zhvendosjen e detyruar të hetohej nga Gjykata Penale Ndërkombëtare, Human Rights Watch kërkoi gjithashtu sanksione kundër Izraelit duke përfshirë ndërprerjen e shitjeve të armëve.

Bëhet e ditur se raporti i grupit të shquar ndërkombëtar të të drejtave, i titulluar “Të pashpresë, të uritur dhe të rrethuar”: Zhvendosja e detyruar nga Izraeli i palestinezëve në Gaza, synon një nga politikat më të diskutueshme të Izraelit, e që është përdorimi i urdhrave të evakuimit, të cilat kanë nxitur zhvendosjen masive brenda Gazës.

Kjo ka çuar në zhvendosjen e më shumë se 90% të popullsisë – 1.9 milionë palestinezë – dhe shkatërrimin e gjerë të një pjese të madhe të vendit gjatë 13 muajve të fundit, shkruan the Guardian, përcjell Telegrafi.

Siç raportohet, Konventa e katërt e Gjenevës përcakton se në territorin e pushtuar, zhvendosja e civilëve duhet të ndodhë vetëm në rrethana të jashtëzakonshme për “arsye ushtarake të domosdoshme” ose për sigurinë e popullatës dhe kërkon masa mbrojtëse dhe strehim të duhur.

Parimet udhëzuese të OKB-së për zhvendosjen e brendshme thonë gjithashtu se, në të gjitha rrethanat, palët në konflikt duhet të “parandalojnë dhe shmangin kushtet që mund të çojnë në zhvendosjen e personave”.

Por, pavarësisht këtyre kushteve, Izraeli ka përdorur në mënyrë të përsëritur urdhrat e evakuimit – në Liban si dhe në Gaza – për të zhvendosur me forcë civilët edhe pse urdhrat e evakuimit nuk kanë status ligjor.

Ndërsa liderët izraelitë dhe Forcat e Mbrojtjes së Izraelit kanë justifikuar përdorimin e urdhrave të evakuimit, duke argumentuar se përdorimi i tyre demonstron mbrojtjen e civilëve në kohë lufte, grupi thotë se në vend të kësaj ata kanë dëmtuar palestinezët.

“Izraeli pretendon se zhvendosja e pothuajse të gjithë popullsisë së Gazës është për sigurinë e popullsisë dhe për arsye të domosdoshme ushtarake, dhe ka marrë hapat e nevojshëm për të mbrojtur civilët”, thuhet në raport.

“Për shkak se grupet e armatosura palestineze po luftojnë, pretendojnë zyrtarët izraelitë, ushtria ka evakuuar civilët për t’i mundësuar asaj të shënjestrojë luftëtarët dhe të shkatërrojë infrastrukturën e grupeve, siç janë tunelet”, shton ai.

“Por në vend që të garantojnë sigurinë e civilëve, urdhrat e evakuimit kanë shkaktuar dëme të rënda”.

Sipas ligjit ndërkombëtar, Izraeli është nën një detyrim ligjor për të lehtësuar kthimin e personave të zhvendosur në shtëpitë e tyre në zonat ku armiqësitë kanë pushuar.

Në vend të kësaj, thonë raportet, Izraeli “i ka bërë zona të mëdha të Gazës të pabanueshme”, duke shkatërruar ose duke dëmtuar rëndë infrastrukturën civile, shkollat ​​dhe institucionet fetare dhe kulturore.

HRW shtoi se zhvendosja e përhershme e civilëve për të krijuar zona tampon ushtarake brenda Rripit të Gazës do të përbënte gjithashtu spastrim etnik. /Telegrafi/