Hovenier këshillon Peter Sorensen, emisarin e ri për dialog: Mos negocio zotime të reja

Ish-ambasadori i Shteteve të Bashkuara në Kosovë, Jeffrey Hovenier, ka këshilluar emisarin e Bashkimit Europian për dialogun, Peter Sorensen, që të mos negociojë zotime të reja mes Kosovës dhe Serbisë, por të fokusohet në zbatimin e marrëveshjeve ekzistuese.

Këto deklarata, Hovenier i bëri gjatë një diskutimi në“Atlantic Council”, ku theksoi se Kosova ka bërë një zotim për Asociacionin e komunave me shumicë serbe që nga viti 2013, dhe ai zotim vazhdon të mbetet në fuqi, transmeton Telegrafi.

Ish-ambasadoi pohoi se kjo çështje është ripërsëritur edhe në Marrëveshjen Bazike të vitit 2023 dhe në Aneksin e saj të Zbatimit.

“Dhe, nëse do t’i jepja një këshillë Peter Sorensenit dhe BE-së rreth dialogut është se mendoj se mënyra më e mirë për të ecur përpara është të mos negociosh zotime të reja tani, sepse ajo që u arrit në vitin 2023 është një paketë mjaft mbresëlënëse. Thjesht mungon zbatimi”, u shpreh Hovenier.

Ai kritikoi si Kosovën, ashtu edhe Serbinë, për mungesën e seriozitetit në përmbushjen e detyrimeve të tyre, duke theksuar se të dyja palët do të përfitonin nga zbatimi i plotë i marrëveshjeve.

Hovenieri ka theksuar se një nga pikat e ngecjes në raportin Kosovë – Serbi ka qenë implementimi i mbrojtjes kushtetuese për komunitetet pakicë, veçanërisht atij serb, si dhe mënyra se si Serbia mund të ushtrojë të drejtën e saj për të mbështetur komunitetin serb në Kosovë, në përputhje me Planin e Ahtisaarit dhe Kushtetutën e Kosovës.

Ish-ambasadori mes tjerash deklaroi se duke ecur përpara, të dyja shtetet mund të kenë përfitime.

Gjatë diskutimit, Hovenier foli edhe për zgjedhjet e 9 shkurtit, ku deklaroi se procesi i votimi ka qenë në mënyrë demokratike.

Jeff Hovenier, i lindur në Bellingham, së fundmi doli në pension pas 34 vitesh me Shërbimin e Jashtëm të SHBA. Detyra e tij e fundit ishte si ambasador i SHBA-së në Kosovë. Ai banon në Bellingham. /Telegrafi/